पहिलो त्रैमासमा एनएमबि, माछापुच्छ्रे र एभरेष्ट बैंकको नाफा बढ्यो

चालु आर्थिक वर्ष २०८३/८४ को पहिलो त्रैमासमा एनएमबि, माछापुच्छ्रे र एभरेष्ट बैंकको खुद नाफा बढेको छ। एनएमबि बैंकले सार्वजनिक गरेको असोज मसान्तसम्मको वित्तीय विवरणअनुसार बैंकको खुद नाफा करिब २७ प्रतिशतले बढेर झन्डै १ अर्ब १६ करोड रुपैयाँ पुगेको छ। गत वर्षको सोही अवधिमा बैंकले करिब ९२ करोड रुपैयाँ नाफा कमाएको थियो।

कर्जा नोक्सानी व्यवस्था करिब ३० प्रतिशतले घट्नु र खुद ब्याज आम्दानी बढ्नु नाफा वृद्धिको मुख्य कारण हो। बैंकको कुल कर्जा झन्डै २ खर्ब ७६ अर्ब र कुल निक्षेप करिब ३ खर्ब २४ अर्ब रुपैयाँ पुगेको छ। खराब कर्जा अघिल्लो त्रैमासको तुलनामा थोरै घटेर करिब ४.९ प्रतिशतमा झरेको छ।

माछापुच्छ्रे बैंकको वित्तीय विवरणअनुसार उसको नाफा बढेर झन्डै ५५ करोड रुपैयाँ पुगेको छ। माछापुच्छ्रेको प्रोभिजनिङ रकम घटेर आधाभन्दा कम भएको छ भने खुद ब्याज आम्दानी करिब १६ प्रतिशतले बढेको छ। एभरेष्ट बैंकको नाफा भने करिब ६ प्रतिशतले बढेर झन्डै १ अर्ब २५ करोड रुपैयाँ पुगेको छ।

एभरेष्टको खुद ब्याज आम्दानी थोरै घटे पनि प्रोभिजनिङ झन्डै आधाले कम हुँदा नाफा बढेको हो। तीनै बैंकको कोषको लागत र आधार दर गत वर्षभन्दा घटेको छ।