ओझेलका पर्यटकीय गन्तव्य चिनाउन २०० भन्दा बढी डिजिटल सर्जक परिचालन

सरकारले ओझेलमा परेका पर्यटकीय गन्तव्यलाई विश्वसामु चिनाउन डिजिटल सामग्री सर्जक परिचालन गर्ने भएको छ। संस्कृति, पर्यटन तथा नागरिक उड्डयनमन्त्री खड्गराज पौडेल 'गनेस'ले यो अभियानको पहल गर्नुभएको हो। नेपाल पर्यटन बोर्डको योजनाअनुसार २०० भन्दा बढी सर्जकलाई देशका विभिन्न गन्तव्यमा पुर्‍याइनेछ।

खानपान, भेषभूषा, यात्रा, फोटोग्राफी, भिडियोग्राफी, कला, संस्कृति र जीवनशैलीमा काम गर्ने सर्जकलाई यसमा समेटिनेछ। उनीहरूले स्थानीय प्राकृतिक सौन्दर्य, परम्परा र जनजीवनलाई तस्बिर, भिडियो र अन्य डिजिटल सामग्रीमार्फत अन्तर्राष्ट्रिय दर्शकसम्म पुर्‍याउनेछन्। हिमाली भव्यतादेखि कम चिनिएका गन्तव्य र मौलिक परम्परासम्मलाई उजागर गर्ने लक्ष्य अभियानले राखेको छ।

प्रचारका पुराना तरिकाभन्दा डिजिटल माध्यम र सामाजिक सञ्जाललाई बढी प्रभावकारी ढङ्गले प्रयोग गर्न यो अभियान ल्याइएको हो। मन्त्री पौडेल पर्यटन प्रचारमा डिजिटल मञ्च र रचनात्मक युवाको योगदान ठूलो हुने धारणा राख्दै आउनुभएको छ। अभियानले नयाँ पुस्ताका सर्जकलाई नेपालको पर्यटन पहिचान विश्वभर फैलाउने अवसर दिने अपेक्षा गरिएको छ।

बोर्डले इच्छुक ट्राभल कन्टेन्ट क्रिएटर, भिडियोग्राफर र फोटोग्राफरबाट आवेदन माग गरेको छ।