युक्रेनलाई ५०० प्याट्रियट क्षेप्यास्त्र बेच्न अमेरिकाको स्वीकृति

अमेरिकाले युक्रेनलाई अत्याधुनिक प्याट्रियट हवाई रक्षा क्षेप्यास्त्र बिक्री गर्ने स्वीकृति दिएको छ। अमेरिकी विदेश मन्त्रालयका अनुसार ५०० वटा पीएसी–३ इन्टरसेप्टर क्षेप्यास्त्रको मूल्य करिब २ अर्ब १० करोड अमेरिकी डलर पर्नेछ। यो खर्च युरोपेली मुलुक र क्यानडाले बेहोर्ने र अमेरिकी सरकारको कुनै रकम नलाग्ने मन्त्रालयले जनाएको छ।

भुक्तानीका लागि क्यानडा, जर्मनी र नर्वेले 'जम्पस्टार्ट' कार्यक्रममार्फत दिने सहयोग तथा युरोपेली सङ्घको युक्रेन सहायता ऋण प्रयोग हुनेछ। मुख्य आपूर्तिकर्ता अमेरिकी कम्पनी लकहिड मार्टिन रहनेछ। युक्रेनी राष्ट्रपति भोलोदिमिर जेलेन्स्कीले निर्णयको स्वागत गर्दै रुसी ब्यालिस्टिक क्षेप्यास्त्र रोक्ने एकमात्र प्रभावकारी उपाय प्याट्रियट भएको बताउनुभएको छ।

तर नयाँ उत्पादन हुने यी क्षेप्यास्त्र युक्रेन पुग्न केही वर्ष लाग्न सक्ने उहाँको भनाइ छ। जेलेन्स्कीले शुक्रबार राति पनि क्षेप्यास्त्र छिटो पठाउन अमेरिकालाई फेरि आग्रह गर्नुभएको थियो। पछिल्ला महिनामा आपूर्तिमा ढिलाइ भएको युक्रेनले जनाउँदै आएको छ।

जाडो नजिकिँदा रुसले युक्रेनका ऊर्जा पूर्वाधार र विद्युत् प्रसारण प्रणालीमा आक्रमण बढाएको छ। यो निर्णय यसै महिनाको सुरुमा राष्ट्रपति डोनाल्ड ट्रम्प र जेलेन्स्कीबीच विवाद चुलिएको केही समयपछि आएको हो।