पुराना ठूला नोटमा नोटबन्दीको रास्वपा सांसदको माग, नेकपाको समर्थन

सत्तारूढ राष्ट्रिय स्वतन्त्र पार्टीका सांसद यज्ञमणि न्यौपानेले १,००० र ५०० रुपैयाँका नोटमाथि नोटबन्दी गर्न सरकारसँग माग गर्नुभएको छ। बुधबार प्रतिनिधि सभाको बैठकमा बोल्दै सांसद न्यौपानेले भ्रष्टाचारबाट कमाइएको रकम बैंकिङ प्रणालीभित्र ल्याउनुपर्ने बताउनुभएको छ। उहाँले विगत ३५ वर्षदेखि देश लुटेर जम्मा पारिएको कालो धनको बलमा केही पक्ष जनमतविरुद्ध सङ्घर्षमा उत्रन खोजेको आरोप लगाउनुभएको छ।

त्यस्तो रकम विभिन्न ठाउँमा लुकाइएको सुनिएकाले नोटबन्दी आवश्यक भएको उहाँको तर्क छ। उहाँले भ्रष्टाचारीले लुकाएको पैसा खरानीमा बदल्नुपर्ने र उनीहरूले गरिरहेको भनिएको षड्यन्त्र यहीँ रोक्नुपर्ने बताउनुभएको छ। सांसद न्यौपानेले आवश्यक परेमा नयाँ नोट जारी गर्न र भारतको अनुभवबाट सिक्न सुझाव दिँदै त्यहाँ पनि यस्ता नोट बन्द गरिएको स्मरण गराउनुभएको छ।

उहाँको प्रस्तावलगत्तै विपक्षी दल नेपाली कम्युनिस्ट पार्टी अर्थात् नेकपाका प्रमुख सचेतक युवराज दुलालले पूर्ण समर्थन जनाउनुभएको छ। प्रमुख सचेतक दुलालले पुराना १,००० र ५०० का नोट तत्काल बन्द गर्न रास्वपा नेतृत्वको सरकारसँग माग गर्नुभएको छ। आवश्यक परे नेकपाका संघीय संसदका सबै सांसदको हस्ताक्षर आजै बुझाउन तयार रहेको उहाँले घोषणा गर्नुभएको छ।

दुलालले भ्रष्टाचारको रकम भनिएका नोट बन्द गर्न सरकारलाई के कुराले रोकेको छ भन्दै प्रश्न गर्नुभएको छ।