हिमालय एयरलाइन्सको काठमाडौँ–साङ्घाई सिधा उडान असोज १२ देखि पुनः सुरु

हिमालय एयरलाइन्सले काठमाडौँ–साङ्घाई–काठमाडौँ नियमित सिधा उडान असोज १२ गतेदेखि पुनः सुरु गर्ने भएको छ। उडान त्रिभुवन अन्तर्राष्ट्रिय विमानस्थल र चीनको साङ्घाई पुडोङ अन्तर्राष्ट्रिय विमानस्थलबीच हुनेछ। एयरलाइन्सका अनुसार सुरुमा साताको दुईवटा उडान सञ्चालन हुनेछन्।

काठमाडौँबाट प्रत्येक सोमबार र शुक्रबार तथा साङ्घाईबाट मङ्गलबार र शनिबार उडान हुनेछ। स्थानीय समयअनुसार काठमाडौँबाट साँझ ६ बजेर २५ मिनेटमा उड्ने विमान भोलिपल्ट बिहान २ बजे साङ्घाई पुग्नेछ। फर्कने उडान साङ्घाईबाट बिहान ३ बजे उडेर बिहान ७ बजेर १० मिनेटमा काठमाडौँ आइपुग्नेछ।

पहिलो चरणको तालिका काठमाडौँबाट अक्टोबर २३ सम्म र साङ्घाईबाट अक्टोबर २४ सम्मका लागि तय गरिएको छ। यो सेवासँगै यस रुटमा नियमित सिधा उडान गर्ने एक मात्र वायुसेवा हिमालय हुने एयरलाइन्सले जनाएको छ। एयरलाइन्सका उपाध्यक्ष विजय श्रेष्ठले यो उडानले नेपालमा चिनियाँ पर्यटक बढाउन मद्दत गर्ने विश्वास व्यक्त गर्नुभएको छ।

उहाँका अनुसार यसले नेपाल र चीनबीच व्यापार, पर्यटन र जनस्तरको सम्बन्ध जोड्न पनि सघाउनेछ। टिकट एयरलाइन्सका टिकट काउन्टरलगायतका माध्यमबाट किन्न सकिन्छ। यात्रुको माग र सिट भरिने अवस्था हेरेर उडान सङ्ख्या थप्ने विषयमा समीक्षा गरिने एयरलाइन्सले जनाएको छ।