कांग्रेस नेता शेखर कोइरालाले मध्यमार्गी बाटो रोज्न आह्वान गरेका छन्। दुवै पक्षको महाधिवेशन रोक्न उनले माग गरेका छन्। पार्टी विभाजन रोक्न उनले अपिल गरेका हुन्।

नेपाली कांग्रेसका नेता डाक्टर शेखर कोइरालाले पार्टीभित्रको आन्तरिक विभाजन रोक्न मध्यमार्गी बाटो रोज्न आह्वान गर्नुभएको छ। एक प्रेस वक्तव्य जारी गर्दै उहाँले सहमति, सहकार्य र एकताको बाटोबाट अघि बढ्न सम्पूर्ण नेता तथा कार्यकर्तालाई आग्रह गर्नुभएको छ। संस्थापन र इतर पक्षले छुट्टाछुट्टै महाधिवेशनको मिति घोषणा गरेपछि उहाँले दुवै महाधिवेशन रोक्न माग गर्नुभएको छ।

घोषित दुई महाधिवेशनले नेपालको राष्ट्रियता र लोकतान्त्रिक आन्दोलनमा गम्भीर आघात पुग्ने उहाँको भनाइ छ। नेता कोइरालाले प्राकृतिक विपत्तिबाट रसुवा, नुवाकोट र धादिङलगायतका क्षेत्रमा प्रभावित नागरिकको समस्याप्रति पार्टी संवेदनशील हुन नसकेको बताउनुभएको छ। कानुन र विधानका धारालाई मात्र आधार बनाएर मानवीय संवेदनामाथि खेलवाड गर्न नहुने उहाँले उल्लेख गर्नुभएको छ।

पार्टीका संस्थापक नेता बीपी कोइरालाको राजनीतिक र नैतिक दर्शनलाई आत्मसात् गर्दै एकढिक्का हुनुपर्नेमा उहाँले जोड दिनुभएको छ। आफ्नै साथीभाइमाथि असुरक्षा, अपमान र घृणा पैदा गरेर निर्माण गरिने महलमाथि आफू बस्न नसक्ने उहाँले स्पष्ट पार्नुभएको छ।