एसियाली खेलकुद क्रिकेट: स्वर्णका लागि पहिलोपटक भारत र पाकिस्तान आमनेसामने

जापानमा जारी २०औँ एसियाली खेलकुदको पुरुष क्रिकेटमा स्वर्ण पदकका लागि भारत र पाकिस्तान पहिलोपटक आमनेसामने हुने भएका छन्। निशिनस्थित कोरोगी स्पोर्ट्स पार्कमा बिहीबार भएको दोस्रो सेमिफाइनलमा भारतले श्रीलंकालाई १२४ रनले पराजित गरेको छ। टस हारेर ब्याटिङमा उत्रिएको भारतले निर्धारित ओभरमा ७ विकेटको क्षतिमा १६९ रनको योगफल खडा गरेको थियो।

भारतका लागि इशान किशन ४६ बलमा ८० रन बनाएर अविजित रहे, जसमा ५ छक्का र ४ चौका छन्। वैभव सूर्यवंशीले ३८ रन जोडे। १७० रनको लक्ष्य पछ्याउँदै श्रीलंकाको इनिङ्स ९.५ ओभरमा ४५ रनमै समेटियो, जसमा नुवानिन्दु फर्नान्डोको १५ रन सर्वाधिक रह्यो।

जसप्रित बुमराह, अक्षर पटेल र अभिषेक शर्मा दुई-दुई विकेटका साथ सफल बलर बने। यसअघि वर्षाका कारण १३ ओभरमा सीमित पहिलो सेमिफाइनलमा पाकिस्तानले बंगलादेशलाई ६ विकेटले हराएको थियो। त्वहिद हृदयको ४२ रनको मद्दतमा बंगलादेशले ७ विकेटमा १११ रन बनाएको थियो।

पाकिस्तानले ४ विकेट गुमाएर ११.३ ओभरमै लक्ष्य भेटायो, अब्दुल समाद १५ बलमा ३० रन बनाएर अविजित रहे। सुफयान मोकिमले ३ विकेट लिए। स्वर्ण पदकको फाइनल शनिबार हुनेछ, बंगलादेश र श्रीलंका सोही दिन कांस्य पदकका लागि खेल्नेछन्।

नेपाली टोली समूह विजेता बनेर क्वार्टरफाइनल पुगेको थियो, तर श्रीलंकासँगको खेल वर्षाले सुरु नै हुन नसकेपछि वरीयताका आधारमा श्रीलंका सेमिफाइनल पुगेको थियो।