एन्फा अध्यक्ष नेम्वाङसहित ४ जनाविरुद्ध ठगी र खेल मिलेमतोको मुद्दा, १० वर्षसम्म कैद माग

अखिल नेपाल फुटबल संघ (एन्फा) का अध्यक्ष पंकज विक्रम नेम्वाङ र महासचिव किरण राईसहित चार जना उच्च पदाधिकारी तथा कर्मचारीविरुद्ध मुद्दा दायर भएको छ। उनीहरूविरुद्ध खेलमा मिलेमतो, अनियमितता तथा ठगीको अभियोग लगाइएको छ।

एन्फामा भएको आर्थिक अनियमितता, खेल मिलेमतो (म्याच फिक्सिङ) तथा ठगी प्रकरणमा नेपाल प्रहरीको केन्द्रीय अनुसन्धान ब्युरो (सीआईबी) ले अनुसन्धान गरेको थियो। सोही अनुसन्धान प्रतिवेदनका आधारमा दायर मुद्दामा अभियुक्तहरूलाई १० वर्षसम्म कैद र ९३ लाख रुपैयाँ बिगो मागदाबी गरिएको छ।

जिल्ला अदालत ललितपुरमा दायर अभियोगपत्रमा फिफा विश्वकप २०२६ का लागि एन्फाले प्राप्त गरेका अनलाइन टिकटको बिक्री तथा वितरणमा गम्भीर अनियमितता र अपचलन भएको उल्लेख छ। अभियोगपत्रमा एन्फाकी केन्द्रीय सदस्य सरिला श्रेष्ठको बयानदेखि फेसबुकमार्फत टिकट बिक्री भएकोसम्मका विषय अनुसन्धानको निष्कर्षका रूपमा समेटिएका छन्।

मुद्दा दायर भएसँगै एन्फाको शीर्ष नेतृत्वमाथि लागेको आर्थिक अनियमितता र खेल मिलेमतोको आरोप अब अदालतमा पुगेको छ।