सुदूरपश्चिममा बजेट विवाद: कांग्रेसको बहिष्कार, प्रदेशसभा बैठक फेरि सर्‍यो

सुदूरपश्चिम प्रदेशको बजेटमाथि विवाद चर्किएपछि प्रमुख प्रतिपक्षी नेपाली कांग्रेसले प्रदेशसभा बहिष्कार गर्ने निर्णय गरेको छ। कांग्रेस संसदीय दलका नेता तथा निवर्तमान मुख्यमन्त्री कमलबहादुर शाहले बजेट ठिक नभएकाले र सरकारले प्रतिपक्षसँग समन्वय नगरेकाले सदन बहिष्कार गरिएको बताउनुभएको छ। कांग्रेसले यो बजेट जनपक्षीय नभएको आरोप पनि लगाएको छ।

प्रदेशसभा सचिवालयका अनुसार मंगलबार बिहान ९ बजेका लागि बोलाइएको बैठक पहिले दिउँसो १ बजे र त्यसपछि साँझ ५ बजेसम्मका लागि सारिएको छ। आइतबार प्रदेशसभामा पेस भएको चालु आर्थिक वर्ष २०८३/८४ को बजेट करिब ३७ अर्ब ७० करोड रुपैयाँको छ। उक्त बजेटप्रति सत्तारूढ नेपाल कम्युनिस्ट पार्टी, नेकपाकै प्रदेशसभा सदस्यहरूले असन्तुष्टि जनाएका थिए।

मंगलबार बसेको नेकपा संसदीय दलको बैठकले बजेट पारित गर्ने, विवाद टुङ्ग्याउन संसदीय छानबिन समिति बनाउने र कात्तिक १५ गतेभित्र पूरक बजेट ल्याउने निर्णय गरेको छ। नेकपाका प्रदेशसभा सदस्य अक्कलबहादुर रावलका अनुसार समितिको छानबिनपछि पूरक बजेटमार्फत बजेटका बेथिति हटाइनेछ। दलको बैठकले पुँजीगत खर्च भने नगर्ने सहमति पनि गरेको छ।

सरकारले कांग्रेसलाई पनि सहमतिमा ल्याउने प्रयास थालेको छ र साँझको बैठकबाटै बजेट पारित गराउने तयारी गरेको छ।