स्थानीय चुनावमा जिल्ला बाहिरबाट मतदानको परीक्षण गर्न सकिने प्रतिवेदन

निर्वाचन आयोगले आगामी स्थानीय तह निर्वाचनबाटै जिल्ला बाहिरबाट मतदानको परीक्षण थाल्न सकिने सुझावसहितको प्रतिवेदन सरकारलाई बुझाएको छ। गृह मन्त्रालयमा पठाइएको प्रतिवेदनमा यसका लागि चाहिने कानुनी र प्राविधिक व्यवस्थाबारे सुझाव समेटिएको निर्वाचन आयुक्तहरू गुरुप्रसाद वाग्ले र डा. राजीब सुब्बाले बताउनुभएको छ।

विदेश र निर्वाचन क्षेत्र बाहिर रहेका मतदातालाई सहभागी गराउन कानुन र प्रविधिमा के गर्न सकिन्छ भन्ने विषय प्रतिवेदनमा राखिएको छ। प्राविधिक पक्षको प्रतिवेदन आयुक्त सुब्बाको संयोजनमा तयार भएको हो। आवश्यक कानुन र प्रविधि तयार भए परीक्षणका लागि तोकिएका स्थानबाट मतदान गराउन सकिने प्रतिवेदनमा उल्लेख छ।

आयोगले प्रत्येक प्रदेशमा कम्तीमा एउटा ठाउँबाट जिल्लाबाहिरको मतदान थाल्न सकिने सम्भावना देखाएको छ। स्थानीय तह निर्वाचन यस वर्षको अन्त्य वा आगामी वर्षको सुरुतिर हुने अनुमान छ।