तिब्बतमा ७ म्याग्निच्युडको भूकम्प, चीनले आपत्कालीन प्रतिक्रिया सुरु गर्‍यो

चीनको तिब्बत स्वायत्त क्षेत्रमा बिहीबार राति ७ म्याग्निच्युडको भूकम्प गएपछि चीनले आपत्कालीन प्रतिक्रिया सुरु गरेको छ। चीन भूकम्प नेटवर्क केन्द्र, सीईएनसीका अनुसार नेपाली समयअनुसार राति ८ बजेर १८ मिनेटमा भूकम्प गएको हो। त्यतिबेला चीनमा स्थानीय समयअनुसार राति १० बजेर ३३ मिनेट भएको थियो।

यसको केन्द्रबिन्दु सिजाङ स्वायत्त क्षेत्रको नाग्छु सहरअन्तर्गत बाकेन काउन्टीमा रहेको केन्द्रले जनाएको छ। केन्द्रबिन्दु उत्तरी अक्षांश ३२.४० डिग्री र पूर्वी देशान्तर ९३.७९ डिग्रीमा रहेको सीईएनसीको विवरणमा उल्लेख छ। भूकम्प जमिनमुनि करिब १० किलोमिटर गहिराइमा गएको थियो।

केन्द्रबिन्दु नाग्छु सहरबाट करिब ११५ किलोमिटर र तिब्बतको राजधानी ल्हासाबाट करिब ४०० किलोमिटर उत्तरमा पर्छ। अमेरिकी भूगर्भ सर्वेक्षण, यूएसजीएसले पनि ७ म्याग्निच्युडकै भूकम्प गएको जनाएको छ। रोयटर्सका अनुसार यो सन् २०२४ जनवरीयता चीनमा गएको सबैभन्दा शक्तिशाली भूकम्प हो।

भूकम्पको धक्का चीनसँगै भारत र म्यानमारसम्म महसुस गरिएको छ। नाग्छु क्षेत्रभर कडा र ल्हासासम्म हल्का कम्पन महसुस भएको थियो। केन्द्रबिन्दु आसपासको भूभाग समुद्री सतहबाट औसत करिब ४ हजार ८ सय ६४ मिटर अग्लो र दुर्गम छ।

चिनियाँ अधिकारीहरूले प्रभावित क्षेत्रको अवस्था र क्षतिको विवरण सङ्कलन गरिरहेका छन्। क्षतिबारे आधिकारिक विवरण अझै सार्वजनिक भएको छैन।