दक्षिणसँग तनाव बढेपछि उत्तर कोरियाले सीमामा लाउडस्पिकर प्रचार फेरि सुरु गर्ने

दक्षिण कोरियासँग तनाव चर्किएपछि उत्तर कोरियाले सीमाभरि लाउडस्पिकरबाट सियोलविरोधी प्रचार प्रसारण केही दिनभित्रै पुनः सुरु गर्ने जनाएको छ। उत्तर कोरियाली नेता किम जोङ उनकी प्रभावशाली बहिनी किम यो जोङले सीमा क्षेत्र निरीक्षणपछि अक्टोबरभित्रै मनोवैज्ञानिक युद्धका लागि लाउडस्पिकर चलाइने बताउनुभएको छ। सरकारी समाचार एजेन्सी केसीएनएले बिहीबार उहाँको भनाइ सार्वजनिक गरेको हो।

दक्षिण कोरियाको रक्षा मन्त्रालयका प्रवक्ता चुङ बिन्नाले उत्तरको कदमको अनुपातिक जवाफ दिइने बताउनुभएको छ, तर अहिलेसम्म कुनै निर्णय नभएको उहाँको भनाइ छ। संयुक्त सेना प्रमुख जिन योङ–सुङले सम्भावित उक्साहटको कडा जवाफ दिन सेनालाई निर्देशन दिनुभएको छ। राष्ट्रपति ली जे म्युङ पदभार सम्हालेलगत्तै सन् २०२५ जुनमा दक्षिण कोरियाले आफ्नो तर्फको प्रसारण रोकेको थियो भने अगस्टमा लाउडस्पिकर नै हटाइएको थियो।

गत सेप्टेम्बर २१ मा सैन्य सीमारेखा दक्षिणतर्फ भएको बारुदी सुरुङ विस्फोटपछि दुई देशबीच तनाव चर्किएको हो। दक्षिण कोरिया र राष्ट्रसंघीय कमान्डले विस्फोट उत्तर कोरियाले बिछ्याएको सुरुङबाट भएको र यो युद्धविराम सम्झौताको उल्लङ्घन भएको निष्कर्ष निकालेका थिए, तर प्योङयाङले संलग्नता अस्वीकार गरेको छ। दक्षिण कोरियाली सेनाका अनुसार उत्तरका सैनिकले यस वर्ष किल्ला निर्माणका क्रममा पटक–पटक सीमारेखा नाघेका छन्, जसको जवाफमा चेतावनी गोली चलाइएको थियो।