इजरायली चुनावअघि ट्रम्पद्वारा नेतान्याहुको खुला समर्थन

अमेरिकी राष्ट्रपति डोनाल्ड ट्रम्पले अक्टोबर २७ मा हुने इजरायली संसदीय निर्वाचनअघि प्रधानमन्त्री बेन्जामिन नेतान्याहुलाई खुला समर्थन गर्नुभएको छ। ट्रुथ सोसलमा लेखिएको सन्देशमा ट्रम्पले नेतान्याहुलाई बलियो, साहसी र प्रतिभाशाली नेताका रूपमा प्रशंसा गर्दै उहाँको अभियानलाई पूर्ण साथ घोषणा गर्नुभएको छ। इजरायलमा अर्को नेता चुनिए इरानसम्बन्धी काम अमेरिकाले एक्लै गर्नुपर्ने ट्रम्पको भनाइ छ।

नेतान्याहुले सामाजिक सञ्जाल एक्समा धन्यवाद दिँदै दुवै देश मिलेर मिसन पूरा गर्ने उल्लेख गर्नुभएको छ। उहाँले आगामी दुई वर्षभित्र वा त्यसअघि नै इरानबाट आउने खतरा हटाउन ट्रम्पसँग मिलेर काम गर्ने बताउनुभएको छ। कडा प्रतिस्पर्धा रहेको यो चुनावमा ट्रम्पको समर्थनले नेतान्याहुको पुनः निर्वाचन अभियानलाई बल दिने अपेक्षा गरिएको छ।

फेब्रुअरीको अन्त्यमा अमेरिका र इजरायलले इरानमाथि आक्रमण गर्दा ट्रम्पले नेतान्याहुलाई साथ दिनुभएको थियो, तर युद्धको विरोध र तेलको मूल्यवृद्धिबीच अप्रिलमा उहाँ युद्धविरामका लागि सहमत हुनुभएको थियो। इरानसँग कूटनीतिक सम्झौता सम्भव नभएको नेतान्याहुको धारणा र वार्ताबाट द्वन्द्व टुङ्ग्याउने ट्रम्पको प्रयासबीच यसअघि मतभेद पनि देखिएको थियो।