नेपाल, भुटान र भारतका याकपालकको साझा सञ्जाल बन्दै

नेपाल, भुटान र भारतका याक तथा चौँरीपालक किसानले हिमालय याकपालकको साझा क्षेत्रीय सञ्जाल औपचारिक रूपमा सुरु गर्न लागेका छन्। सञ्जालको सुरुआत भुटानमा हुने नवौँ रोयल हाइल्यान्ड महोत्सवमा हुनेछ। अन्तर्राष्ट्रिय एकीकृत पर्वतीय विकास केन्द्र, इसिमोडका अनुसार हिमालयका याक किसानमा मात्र केन्द्रित यो पहिलो क्षेत्रीय मञ्च हो।

किसान, सरकार र विकास साझेदारबीच करिब एक दशकदेखि चलेको सहकार्यबाट यो सञ्जाल जन्मिएको इसिमोडको भनाइ छ। जलवायु परिवर्तन, चरन क्षेत्रको ह्रास र बसाइँसराइले हिमाली समुदायमा चुनौती बढिरहेका बेला यो सञ्जाल बन्न लागेको हो। सामूहिक पैरवी, ज्ञान आदानप्रदान, क्षमता विकास र आपसी सहकार्य बढाउनु यसका मुख्य उद्देश्य हुन्।

किसानले नै स्थापना गरेर चलाउँदै आएको विश्व रेनडियर एसोसिएसनको नमुनामा बनेको यो सञ्जालको नेतृत्व पनि हिमाली याकपालक किसान आफैँले गर्नेछन्। इसिमोडका अनुसार महोत्सवमा भुटानका राजा र प्रधानमन्त्रीको उपस्थिति रहनेछ।