सुदूरपश्चिम सरकारले ल्यायो ३७ अर्ब ७० करोडको बजेट

सुदूरपश्चिम प्रदेश सरकारले चालु आर्थिक वर्ष २०८३/८४ का लागि ३७ अर्ब ७० करोड ३९ लाख ६७ हजार रुपैयाँको बजेट प्रस्तुत गरेको छ। आर्थिक मामिलामन्त्री चक्रबहादुर मल्लले आइतबार प्रदेशसभामा बजेट पेस गरेका हुन्।

आर्थिक वर्ष सुरु भएको ८७औँ दिनमा बजेट आएको हो। यसअघि निवर्तमान मुख्यमन्त्री कमलबहादुर शाह नेतृत्वको सरकारले असार १ गते प्रदेशसभामा बजेट पेस गरेको थियो। तर सत्तारूढ दल नेकपा एमालेले बीचमै समर्थन फिर्ता लिएपछि त्यो सरकार असफल भएको थियो। साउन २९ गते सरकार परिवर्तन भएकाले बजेट ढिलो आएको हो।

मन्त्री मल्लले तत्कालीन अर्थमन्त्री विक्रमसिंह धामीले ल्याएकै आकारमा नयाँ बजेट प्रस्तुत गरेका छन्।

बजेटमा सडक निर्माणका लागि ६ अर्ब ४५ करोड रुपैयाँ विनियोजन गरिएको छ। कञ्चनपुरको दैजी–छेलास्थित औद्योगिक क्षेत्रका लागि २ करोड, प्राङ्गारिक मल उद्योग सञ्चालनका लागि ३ करोड ८० लाख र प्रदेश राजधानीको गुरुयोजना निर्माणका लागि १ करोड रुपैयाँ छुट्याइएको छ।