चार प्रदेशमा भारीदेखि धेरै भारी वर्षाको सम्भावना, भोलि मधेशमा पनि

जल तथा मौसम विज्ञान विभागले आज कोशी, बागमती, गण्डकी र लुम्बिनी प्रदेशका थोरै स्थानमा भारीदेखि धेरै भारी वर्षाको सम्भावना रहेको जनाएको छ। भोलि यी चार प्रदेशका साथै मधेश प्रदेशका एक–दुई स्थानमा पनि भारी वर्षा हुनसक्ने विभागले उल्लेख गरेको छ। विभागका अनुसार हाल देशभर मनसुनी वायुसँगै पश्चिमी वायुको आंशिक प्रभाव छ।

बङ्गालको खाडीको गहिरो न्यून चापीय प्रणालीले भारतको आन्ध्र प्रदेश र दक्षिण ओडिशाको तट पार गरेको छ। यो प्रणाली आगामी २४ घण्टामा उत्तर–उत्तरपश्चिमतर्फ सर्दै क्रमशः कमजोर हुने अनुमान छ। आज कोशी, मधेश, बागमती, गण्डकी र लुम्बिनीमा अधिकांश बादल लाग्नेछ भने कर्णाली र सुदूरपश्चिममा साधारणतया बादल रहनेछ।

भोलि देशभर अधिकांश बादल लाग्ने पूर्वानुमान छ। हिमाली र पहाडी भू–भागमा मेघगर्जन र चट्याङसहित मध्यमसम्मको वर्षा वा हिमपात हुनसक्छ। आज मधेश र कोशीको तराईमा तथा भोलि तराईका थप प्रदेशका केही स्थानमा हावाहुरी चल्न सक्छ।

सहरगत पूर्वानुमानअनुसार पोखरामा वर्षाको सम्भावना ८० प्रतिशत र तापक्रम २९ डिग्री सेल्सियस रहने अनुमान छ। काठमाडौँ, विराटनगर र जनकपुरमा वर्षाको सम्भावना ७० प्रतिशत छ। काठमाडौँको तापक्रम २२, विराटनगरको २९ र जनकपुरको ३० डिग्री सेल्सियस रहनेछ।

नेपालगञ्ज र वीरेन्द्रनगरमा वर्षाको सम्भावना ४० प्रतिशत छ, जहाँ क्रमशः ३२ र ३० डिग्री सेल्सियस तापक्रम रहनेछ।