बाढीपहिरोबाट क्षतिग्रस्त सडक दसैँअघि खुलाउन गण्डकीका मुख्यमन्त्रीले संघसँग स्रोत मागे

गण्डकी प्रदेशका मुख्यमन्त्री सुरेन्द्रराज पाण्डेले बाढीपहिरोबाट क्षतिग्रस्त सडक दसैँअघि नै खुलाउन संघीय सरकारसँग स्रोत माग गरेका छन्।

मुख्यमन्त्री पाण्डेले असोज ९ देखि ११ गतेसम्म आएको बाढीपहिरोबाट क्षतिग्रस्त राष्ट्रिय राजमार्ग तथा रणनीतिक सडक तत्काल सञ्चालनमा ल्याउन संघीय सरकारसँग स्रोत मागेका हुन्। उनले बाढीपछिको पुनर्निर्माणमा सघाउन संघ सरकारको ध्यानाकर्षणसमेत गराएका छन्।

अविरल वर्षाका कारण गण्डकी प्रदेशमा ३० जनाको ज्यान गएको छ। बाढी र पहिरोले प्रदेशमा दर्जनौँ सडक, पुल, विद्यालय, सरकारी भवन र सयौँ निजी आवासमा क्षति पुगेको छ।

चाडपर्व नजिकिँदै गर्दा अवरुद्ध सडक सञ्चालनमा ल्याउनु प्रदेश सरकारको प्राथमिकता रहेको मुख्यमन्त्री पाण्डेले संघीय सरकारसँग गरेको मागबाट देखिन्छ।