भारी वर्षाको पूर्वतयारी, गृह र ऊर्जामन्त्री मौसम विभागमा, रातिको यात्रा नगर्न आग्रह

गृहमन्त्री सुधन गुरुङ र ऊर्जामन्त्री विराजभक्त श्रेष्ठले मंगलबार बबरमहलस्थित जल तथा मौसम विज्ञान विभाग पुगेर आगामी भारी वर्षाको तयारीबारे जानकारी लिनुभएको छ। उहाँहरूले महानिर्देशक अर्चना श्रेष्ठ र प्रवक्ता विभूति पोखरेलसहितका अधिकारीसँग सम्भावित जोखिम र आवश्यक तयारीबारे छलफल गर्नुभएको छ। विभागका अनुसार बङ्गालको खाडीमा रहेको न्यून चापीय प्रणाली थप शक्तिशाली बन्दै पश्चिम–उत्तरपश्चिमतर्फ सर्ने देखिएको छ।

विभागले सोमबार जारी गरेको विशेष बुलेटिनअनुसार असोज ९ देखि ११ गतेसम्म गण्डकी र लुम्बिनीका केही स्थानमा हावाहुरी, मेघगर्जन र चट्याङसहित भारी वर्षा हुन सक्छ। यी दुई प्रदेशका एक–दुई स्थानमा अति भारी वर्षाको सम्भावना पनि छ। कोशी, मधेश, बागमती र सुदूरपश्चिमका थोरै स्थानमा भारीदेखि धेरै भारी वर्षाको सम्भावना छ।

उच्च हिमाली भेगमा भारी हिमपात हुने पूर्वानुमान पनि गरिएको छ। प्रवक्ता पोखरेलले डुबान, कटान र पहिरोको खतरा रहेकाले जोखिमयुक्त क्षेत्रमा उच्च सतर्कता अपनाउन र हिमालतर्फ यात्रा नगर्न आग्रह गर्नुभएको छ। सरकारी अधिकारीहरूले असोज ९ देखि ११ गतेसम्म रातिको समयमा यात्रा नगर्न अनुरोध गरेका छन्।

गृहमन्त्री गुरुङले नदी किनार र जोखिमयुक्त क्षेत्रमा टोली परिचालन गर्न र स्थानीयलाई उच्च सतर्क रहन भनिएको बताउनुभएको छ। बागमती प्रदेश सरकारले यात्रा गर्नुअघि सडक र मौसमको अवस्था बुझ्न नागरिकलाई आग्रह गरेको छ।