प्रहरी पोशाक खरिद अध्ययन उपसमितिले पारित गर्‍यो १९ बुँदे कार्यविधि, सांसद सुनारको प्रहरीलाई चुनौती

निर्वाचन प्रहरी, नेपाल प्रहरी र सशस्त्र प्रहरी बल, नेपालको पोशाक खरिदसम्बन्धी अध्ययन उपसमितिले १९ बुँदे कार्यविधि सर्वसम्मतिले पारित गरेको छ। बुधबार सिंहदरबारमा बसेको उपसमितिको पहिलो बैठकले उक्त कार्यविधि पारित गर्दै सबै सदस्यले हस्ताक्षर गरेका हुन्।

राष्ट्रिय प्रजातन्त्र पार्टीकी प्रमुख सचेतक खुश्बु ओलीले निर्वाचन प्रहरीको पोशाक खरिद प्रक्रियाबारे राजनीतिक आग्रह–पूर्वाग्रहभन्दा माथि उठेर निष्पक्ष रूपमा अध्ययन गर्ने बताएकी छन्।

यसैबीच, राष्ट्रिय स्वतन्त्र पार्टीका सांसद खगेन्द्र सुनारले आफूसँग जोडिएको आर्थिक अनियमितताको प्रमाण भए पक्राउ गरेर देखाउन नेपाल प्रहरीलाई चुनौती दिएका छन्। बुधबार सिंहदरबारमा बोल्दै उनले प्रहरीलाई धम्क्याउन नभई प्रमाण भए पक्राउ गर्न भनेका हुन्।

राजदूत नियुक्तिमा करोडौं रकम असुलेको आरोपबारे पनि सांसद सुनारले आफ्नो बचाउ गरेका छन्। उनले उक्त आरोप प्रहरी महानिरीक्षक (आईजीपी) को षड्यन्त्र भएको दाबी गरेका छन्।