दसैँको अग्रिम टिकटका लागि नयाँ बसपार्कमा यात्रुको भीड

दसैँका लागि बसको अग्रिम टिकट बुकिङ आज शुक्रबार असोज २३ गतेदेखि खुला भएको छ। टिकट खुल्नुअघि नै बिहीबार रातिदेखि काठमाडौँको गोङ्गबुस्थित नयाँ बसपार्कमा यात्रुको लाइन लागेको थियो। नयाँ बसपार्क सञ्चालन गर्दै आएको लोत्से बहुउद्देश्यीय प्राइभेट लिमिटेडका महाप्रबन्धक पङ्कज मल्लले बिहीबार राति ९ बजेदेखि यात्रु लाइनमा बस्न थालेको बताउनुभएको छ।

उहाँका अनुसार बझाङ, बाजुरा र धनगढी जाने यात्रु राति नै टिकटका लागि आइपुगेका थिए। कम्पनीले बसपार्कमा थप १५ टिकट काउन्टर खोलेको छ। यातायात व्यवस्था विभाग, नेपाल प्रहरी र यातायात व्यवसायी तथा मजदुरबीच असोज २० गते मङ्गलबार बसेको बैठकले अग्रिम टिकट खोल्ने निर्णय गरेको थियो।

विभागले बसपार्कमा लाइन बस्नुको सट्टा अनलाइन एपमार्फत टिकट काट्न यात्रुलाई आग्रह गरेको छ। अनलाइन टिकट सेवा प्रदायक बस सेवाले भने बिहीबारदेखि नै अग्रिम बुकिङ खुला गरेको जनाएको छ। यसको एप वा वेबसाइटबाट यात्रुले घरबाटै गन्तव्य, यात्रा मिति, बस र सिट छान्न सक्नेछन्।

बस सेवाबाट अग्रिम टिकट लिने यात्रुले करिब १०० रुपैयाँसम्म छुट पाउने कम्पनीले जनाएको छ। व्यवसायीका अनुसार पछिल्ला दिनमा विशेषगरी लामो दूरीका बसमा यात्रुको चाप बढेको छ। अग्रिम टिकट खुलेसँगै दसैँको मुख्य समयमा घर जाने यात्रुको चाप अझ बढ्ने अनुमान गरिएको छ।

दसैँ नजिकिँदा काठमाडौँका मुख्य सडक र चोकमा पनि सवारी चाप र ट्राफिक जाम बढेको छ।