र्‍यान्समवेयर आक्रमणपछि सेयर कारोबार पुनः सुचारु, नेप्से बढ्यो

डेटा सेन्टरमा भएको साइबर आक्रमणका कारण सोमबार एक दिन ठप्प सेयर बजार आज मंगलबार फेरि सुचारु भएको छ। कारोबार खुलेकै दिन नेप्से परिसूचक करिब ७ अंक बढेर करिब २६५४ बिन्दुमा बन्द भएको छ। आज करिब ७ अर्ब ५ करोड रुपैयाँको सेयर किनबेच भएको छ, जुन गत शुक्रबारको करिब ६ अर्ब ७४ करोड रुपैयाँभन्दा बढी हो।

सबैभन्दा धेरै कारोबार हाथवे इन्भेष्टमेन्ट नेपालको भएको छ। मिड सोलु हाइड्रोपावरको सेयरमूल्य सकारात्मक सर्किटमा पुगेको छ भने स्नो रिभर्सका लगानीकर्ताले सबैभन्दा बढी गुमाएका छन्। नेप्सेका अनुसार करिब ७२ ब्रोकर कम्पनीको कारोबार प्रणाली राखिएको डेटा हब प्राइभेट लिमिटेडको डेटा सेन्टरमा आइतबार बिहानैदेखि समस्या देखिएको थियो।

नेप्सेले सुरुमा यसलाई प्राविधिक समस्या भनेको थियो, तर पछि यो र्‍यान्समवेयर आक्रमण भएको खुलेको छ। नेप्सेको मुख्य प्रणालीमै क्षति पुग्न सक्ने जोखिम र स्टक ब्रोकर एसोसिएसन अफ नेपालको अनुरोधपछि सोमबारको कारोबार स्थगित गरिएको थियो। डेटा हबको बुटवलस्थित विपद् पुनर्लाभ केन्द्रमा रहेको ब्याकअपबाट प्रणाली पुनर्स्थापना गरेपछि आज कारोबार सुरु भएको हो।

नेप्सेले समस्या समाधान भएको जनाए पनि आक्रमण ह्याकिङसँग जोडिएको हुँदा प्रणालीमा जुनसुकै बेला फेरि अवरोध आउन सक्ने चेतावनी आईटी विज्ञहरूले दिएका छन्।