कूटनीतिक र सरकारी राहदानीमा कजाकिस्तानसँग भिसा छुट सम्झौता, रोमानियासँग भेटवार्ता

नेपाल र कजाकिस्तानले कूटनीतिक तथा सरकारी वा सेवा राहदानी बोक्नेहरूलाई भिसाबाट छुट दिने सम्झौतामा हस्ताक्षर गरेका छन्। न्युयोर्कमा जारी संयुक्त राष्ट्रसंघको ८१औँ महासभाको साइडलाइनमा परराष्ट्रमन्त्री शिशिर खनाल र कजाकिस्तानका परराष्ट्रमन्त्री मुख्तार त्लिउबर्दीले आफ्ना सरकारको तर्फबाट सम्झौतामा सही गर्नुभएको छ। सम्झौताअनुसार यस्ता राहदानी भएका दुवै देशका नागरिकले अर्को देशको भ्रमण गर्दा भिसा लिनुपर्ने छैन।

परराष्ट्रमन्त्री खनालको सचिवालयका अनुसार यो व्यवस्थाले दुई देशबीच आवतजावत सजिलो बनाउने र सहकार्य बढाउने अपेक्षा छ। हस्ताक्षरअघि दुई मन्त्रीबीच द्विपक्षीय भेट भएको थियो, जसमा साझा हितका विषय र सम्बन्ध विस्तारबारे कुराकानी भएको थियो। कजाकिस्तान मध्य एसियाको सबैभन्दा ठूलो भूपरिवेष्ठित मुलुक हो।

रुस, चीन, किर्गिस्तान, उज्बेकिस्तान र तुर्कमेनिस्तानसँग सिमाना जोडिएको यो देश क्षेत्रफलमा विश्वको नवौँ ठूलो देश हो र तेल, ग्यास तथा युरेनियमका लागि चिनिन्छ। यसैबीच, मन्त्री खनालले राष्ट्रसंघ मुख्यालयमा रोमानियाकी परराष्ट्रमन्त्री ओआना–सिल्भिया तोइउसँग पनि छुट्टै भेटवार्ता गर्नुभएको छ। भेटमा नेपाल–रोमानिया सहकार्यलाई फराकिलो बनाउने र आपसी लाभका नयाँ क्षेत्र खोज्नेबारे छलफल भएको छ।

दुवै पक्षले जलवायु कार्यलगायतका क्षेत्रमा सहकार्य अझ प्रभावकारी बनाउनुपर्नेमा जोड दिएका छन्। साझा चासोका विषयमा आगामी दिनमा पनि सहकार्य जारी राख्नेबारे दुई मन्त्रीबीच कुरा भएको छ।