श्रम संस्कृतिका सांसद राईको रास्वपालाई आग्रह: आफ्नै सरकार नढाल्नुहोस्

श्रम संस्कृति पार्टीका सांसद ध्रुवराज राईले सत्तारूढ राष्ट्रिय स्वतन्त्र पार्टीलाई आफ्नै सरकार आफैँ नढाल्न र पाँच वर्षको पूरा कार्यकाल शासन गर्न आग्रह गर्नुभएको छ। शुक्रबार प्रतिनिधिसभाको बैठकमा बोल्दै उहाँले वर्षे अधिवेशनमा प्रतिपक्षले उठाएका प्रश्नको जवाफ प्रधानमन्त्री बालेन शाहबाट नआएको गुनासो गर्नुभएको छ। विभिन्न मन्त्रालयका मन्त्रीहरूले आफ्ना विषयमा जवाफ दिएकोमा भने उहाँले आभार प्रकट गर्नुभएको छ।

अधिवेशन टुंगिन लाग्दा भोजपुरका जनतामाझ रित्तो हात र उत्साहविना फर्किनुपरेको सांसद राईले बताउनुभएको छ। दुई तिहाइ बहुमत भएको सरकारको कामकारबाहीमाथि प्रश्न उठाउनुपर्ने अवस्था आएकोमा उहाँले प्रधानमन्त्रीको ध्यानाकर्षण गराउनुभएको छ। प्रधानमन्त्रीलाई सदनमा बोलाउन बारम्बार माग गर्दा पनि उहाँ उपस्थित नभएको अवस्था अर्को अधिवेशनमा नदोहोरियोस् भन्ने राईको माग छ।

विगतका जनआन्दोलन र दलहरूका गतिविधिप्रति जनताको आक्रोश सम्झाउँदै उहाँले भ्रष्टाचार रोक्न सरकारलाई सजग गराउनुभएको छ। दसैँको शुभकामना दिँदै राईले आगामी अधिवेशनमा प्रतिपक्षका मागको अपमान नहोस् र सरकारले विपक्षलाई समेटेर अघि बढोस् भन्ने अपेक्षा राख्नुभएको छ।