कोशी ब्यारेजमा रातो बत्ती, सप्तकोशी खतराको तहमा

सप्तकोशी नदीमा पानीको बहाव खतराको तहमा पुगेपछि कोशी ब्यारेजमा रातो बत्ती बालिएको छ। कोशी ब्यारेज कन्ट्रोल रुमका अनुसार बिहीबार साँझको मापनमा नदीमा करिब १ लाख ८५ हजार क्युसेक पानी बगेको छ। बहाव नियन्त्रण गर्न ब्यारेजका कुल ५६ ढोकामध्ये २३ वटा खोलिएका छन्।

सुनसरीका प्रहरी नायब उपरीक्षक चन्द्रबहादुर खड्काका अनुसार ब्यारेजमा मूल ५२ र नहरतर्फ ४ ढोका छन्। खतराको सङ्केतस्वरूप ब्यारेजमा रातो झन्डासमेत फहराइएको छ। बहाव हाल स्थिर देखिए पनि जोखिम उच्च रहेकाले प्रशासनले ब्यारेजलाई खतराको सूचीमा राखेको छ।

ब्यारेज क्षेत्रमा बिहीबार साँझदेखि फेरि वर्षा सुरु भएको छ। जलाधार क्षेत्र र पूर्वी पहाडमा पानी परिरहेकाले बहाव अझै बढ्न सक्ने अनुमान छ। सुनसरीका प्रमुख जिल्ला अधिकारी इश्वरी प्रसाद अर्यालले तटीय क्षेत्र र जोखिमयुक्त बस्तीका बासिन्दालाई उच्च सतर्कता अपनाउन आग्रह गर्नुभएको छ।

सुनसरी र सप्तरीका नदी किनार तथा होचा भू-भागमा कटान र बाढीको जोखिम रहेको स्थानीय प्रशासनले जनाएको छ। कोशी ब्यारेज हुँदै आवतजावत गर्नेलाई पनि सुरक्षा निकायले होसियार रहन भनेको छ। जल तथा मौसम विज्ञान विभागको पूर्वानुमानअनुसार शुक्रबार कोशी प्रदेशका थोरै स्थानमा भारीदेखि धेरै भारी वर्षाको सम्भावना छ।

विभागको पछिल्लो पूर्वानुमानअनुसार विराटनगरमा वर्षाको सम्भावना ८० प्रतिशत र तापक्रम २३ देखि २५ डिग्री सेल्सियस रहनेछ।