लगातार वर्षाले नुवाकोट–रसुवाका बाढी प्रभावितका टेन्टमा पानी, रेडक्रसले त्रिपाल बाँड्यो

भदौ १० गतेको भोटेकोशी बाढीपछि रसुवाबाट विस्थापित भई नुवाकोटमा बसेका परिवारका टेन्टमा बिहीबारदेखिको लगातार वर्षाले पानी पसेको छ। उत्तरगया गाउँपालिका–१ का वडाध्यक्ष मानसिंह तामाङका अनुसार छानाबाट चुहिएको पानी र भलले राहतमा पाएको सामान जोगाउन गाह्रो भएको छ। विदुर नगरपालिका–५ बाणाचौतारोमा मात्रै सयभन्दा बढी विस्थापित परिवार अस्थायी टेन्टमा छन्। खाद्यान्न र लत्ताकपडा भिजेका छन् भने ज्येष्ठ नागरिक र बालबालिकाको कठिनाइ झन् बढेको छ।