दसैँमा उपत्यकाबाट करिब १० लाखसम्म यात्रु बाहिरिने अनुमान, भाडादर अब विभागको वेबसाइटमा

यस वर्ष दसैँमा काठमाडौँ उपत्यकाबाट करिब ६ लाखदेखि १० लाखसम्म यात्रु आफ्नो गाउँघर जाने अनुमान प्रतिनिधिसभाको पूर्वाधार विकास समितिले गरेको छ। समितिका सभापति आशिष गजुरेलसहितको टोलीले दसैँको सार्वजनिक यातायात व्यवस्थापनसम्बन्धी प्रतिवेदन प्रधानमन्त्री बालेन शाह र भौतिक पूर्वाधार तथा यातायातमन्त्री सुनिल लम्साललाई बुझाएको छ। प्रतिवेदनअनुसार घटस्थापनाको दिन करिब ४५ हजारदेखि ६८ हजार यात्रु उपत्यका छाड्नेछन्।

सबैभन्दा बढी चाप फूलपातीमा हुने र त्यस दिन यो सङ्ख्या करिब १ लाख १३ हजार पुग्ने अनुमान छ। यी यात्रु ओसार्न ७ हजारभन्दा बढी सवारीसाधन चल्नेछन्। यातायात व्यवसायीले भने वास्तविक यात्रु सङ्ख्या अझ धेरै हुने अनुमान गरेका छन्।

यसैबीच, यातायात व्यवस्था विभागले आफ्नो वेबसाइटमा ‘भाडा दर खोजी’ सुविधा सुरु गरेको छ। यात्रुले अब जुनसुकै ठाउँबाट आफ्नो गन्तव्यको भाडा दर हेर्न सक्नेछन्। यसअघि भाडा दर सार्वजनिक रूपमा हेर्ने यस्तो सुविधा उपलब्ध थिएन।