दल छाडेका युवाद्वारा वैकल्पिक शक्तिका रूपमा 'हुंकार मधेश' घोषणा

विभिन्न राजनीतिक दल छाडेका युवाहरूले मधेश र देशका लागि वैकल्पिक राजनीतिक शक्ति बनाउने लक्ष्यसहित ‘हुंकार मधेश’ नामक अभियान घोषणा गरेका छन्। शुक्रबार काठमाडौँमा आयोजित कार्यक्रममार्फत उक्त अभियान सार्वजनिक गरिएको हो। जनता समाजवादी पार्टी नेपाल छाडेका रामकुमार शर्मा र राष्ट्रिय मुक्ति पार्टी नेपाल छाडेका केशव झाले अभियानको नेतृत्व गरिरहनुभएको छ।

जेनजी आन्दोलनपछि आफ्ना पुराना दलभित्र पुस्तान्तरणको माग उठाए पनि नेतृत्व नफेरिएपछि उनीहरूले नयाँ अभियान थालेको जनाइएको छ। कार्यक्रममा झाले युवा पुस्तालाई राजनीतिमा आकर्षित गर्नु अभियानको प्रमुख उद्देश्य भएको बताउनुभएको छ। राजनीतिलाई फोहोरी खेलका रूपमा हेर्ने चलनले योग्य र विद्वान् व्यक्तिहरू राजनीतिबाट पन्छिँदै गएको उहाँको भनाइ छ।

मधेश केन्द्रित दलहरूलाई एउटै पार्टी बनाएर अघि बढ्ने आफ्नो प्रस्ताव ती दलले नमानेपछि छुट्टै अभियान सुरु गर्नुपरेको झाले उल्लेख गर्नुभएको छ। ज्ञानी, शिक्षित र आत्मनिर्भर व्यक्तिहरू नै राजनीतिक नेतृत्वमा पुग्नुपर्ने उहाँको धारणा छ। राजनीतिक नेतृत्वले आफ्नो व्यक्तित्व र सामाजिक सम्मान फेरि स्थापित गर्नुपर्ने पनि उहाँले बताउनुभएको छ।

अभियानले बलियो राजनीतिक सङ्गठनको जग बसाल्ने र सक्षम युवा नेतृत्व तयार पार्ने लक्ष्य लिएको छ। यो अभियानले सनातन धर्मको पक्षमा वकालत गर्ने जनाइएको छ।