१३ देशका प्रस्तावित राजदूतको संसदीय सुनुवाइ सुरु, दसैँअघि टुङ्ग्याउने

सङ्घीय संसद्को संसदीय सुनुवाइ समितिले १३ देशका लागि सिफारिस गरिएका प्रस्तावित राजदूतहरूको सुनुवाइ प्रक्रिया सुरु गरेको छ। सिंहदरबारमा बिहीबार बसेको समितिको बैठकले उनीहरूविरुद्ध उजुरी दिन १० दिनको समय तोकेको छ। समितिले सुनुवाइ दसैँअघि नै सम्पन्न गर्ने लक्ष्य लिएको छ।

सूचना प्रकाशित भएको मितिले १० दिनभित्र जोकोहीले पनि प्रस्तावित राजदूतबारे जानकारी वा उजुरी दिन सक्ने समितिले जनाएको छ। उजुरी विद्युतीय माध्यम वा अन्य कुनै तरिकाबाट दिन सकिन्छ, तर त्यसमा स्पष्ट आधार र सम्बन्धित जानकारी खुलाउनुपर्छ। कूटनीतिक पदमा मनोनीत व्यक्तिबारे सर्वसाधारणलाई जानकारी दिन र सूचना सङ्कलन गर्न उजुरी आह्वान गरिएको हो।

समितिले सुनुवाइका लागि प्राप्त मनोनीत व्यक्तिहरूको नाम सार्वजनिक गर्ने जनाएको छ। समितिका सभापति बोधनारायण श्रेष्ठका अनुसार बायोडाटा, कार्ययोजना र उजुरी गरी तीन आधारमा सुनुवाइ गरिनेछ। राजदूतहरूको बायोडाटा समितिमा आइपुगिसकेकाले त्यसको अध्ययन तुरुन्तै थाल्न सकिने उहाँले बताउनुभएको छ।

प्रस्तावित राजदूतले बुझाउने नतिजामुखी कार्ययोजनाको अध्ययन पनि उजुरी अवधिकै बीचमा गरिने सभापति श्रेष्ठले जानकारी दिनुभएको छ। उजुरीबाहेकका तयारी समानान्तर रूपमा अघि बढाएर प्रक्रिया छिटो टुङ्ग्याउने योजना रहेको उहाँले बताउनुभएको छ। मन्त्रिपरिषद्को असोज २ गते बसेको बैठकले १३ देशका लागि राजदूत सिफारिस गरेको थियो।