आज चार प्रदेशमा वर्षा र हिमपातको सम्भावना, सोमबार र मंगलबार धेरै स्थानमा भारी वर्षा हुन सक्ने

आज कोशी, बागमती, गण्डकी र लुम्बिनी प्रदेशका हिमाली तथा पहाडी भूभागमा वर्षा र हिमपातको सम्भावना रहेको छ। मौसम पूर्वानुमान महाशाखाका अनुसार यी चार प्रदेशका थोरै ठाउँमा हल्कादेखि मध्यम वर्षा हुन सक्छ। पहाडी क्षेत्रमा बदली रहनेछ।

भोलि आइतबारदेखि वर्षा फेरि सक्रिय हुने र दुई दिन भारी वर्षाको सम्भावना रहेको छ। सोमबार र मंगलबार देशका धेरै स्थानमा भारी वर्षा हुन सक्ने पूर्वानुमान गरिएको छ।

कमजोर पश्चिमी वायुको प्रभावका कारण माथिल्लो वायुमण्डलीय बहावसँगै नेपाल आसपास न्यूनचापीय रेखा बन्ने र त्यसको प्रभाव नियमित रूपमा सक्रिय हुने देखिएको छ। यसैका कारण मौसमी प्रणाली फेरि सक्रिय हुन लागेको हो।