उपत्यकामा रात्रिकालीन बस विस्तार: ९ स्थानीय तह मिलेर ६ रुटमा ३० बस

काठमाडौं उपत्यकाका ९ स्थानीय तह रात्रिकालीन बस सेवा विस्तारका लागि एउटै कार्यक्रममा आबद्ध भएका छन्। काठमाडौं महानगरपालिकाको नेतृत्वमा साझा यातायातसँग सहकार्य गर्दै संविधान दिवसका दिन समझदारीपत्रमा हस्ताक्षर भएको हो। हस्ताक्षर गर्नेमा काठमाडौं र ललितपुर महानगरपालिकासँगै बुढानीलकण्ठ, गोदावरी, चन्द्रागिरी, कीर्तिपुर, भक्तपुर, सूर्यविनायक र मध्यपुर थिमी नगरपालिका छन्।

समझदारीअनुसार सेवा ६ रुटमा विस्तार हुनेछ र करिब ३० बस सञ्चालनमा आउनेछन्। जगाती–सूर्यविनायक हुँदै ठमेल, लगनखेल–गोदावरी, रिङरोड, कीर्तिपुर–जमल, टाखेल–ठमेल र नागढुङ्गा–विमानस्थल रुट तोकिएका छन्। गत वैशाख १ गतेदेखि परीक्षणका रूपमा बुढानीलकण्ठ–लगनखेल र विमानस्थल–चन्द्रागिरी रुटमा सेवा सञ्चालन हुँदै आएको छ।

यो सेवा राति आवतजावत गर्ने श्रमिक, विद्यार्थी, व्यवसायी, बिरामी र पर्यटकलाई लक्षित छ। कार्यवाहक प्रमुख सुनिता डंगोलका अनुसार पहिलो ९० दिनमै करिब ६७ हजार यात्रुले सेवा लिएका छन्। समझदारीअनुसार नपुग खर्चको ५० प्रतिशत सात नगरपालिकाले र बाँकी ५० प्रतिशत जनसंख्याका आधारमा काठमाडौं, ललितपुरसहितका नगरपालिकाले बेहोर्नेछन्।

ललितपुर महानगरपालिकाका प्रमुख चिरीबाबु महर्जनले सञ्चालन खर्च उपत्यकाका १८ वटै स्थानीय तहले व्यहोर्ने गरी सेवा निःशुल्क बनाउन प्रस्ताव गर्नुभएको छ। महर्जनका अनुसार काठमाडौं र ललितपुर महानगरपालिका तुलनात्मक रूपमा ठूलो हिस्सा व्यहोर्न तयार छन्।