यू–१९ महिला क्रिकेट: अपराजित रहँदै नेपाल बेल्ट एन्ड रोड सिरिजको च्याम्पियन

नेपाली यू–१९ महिला क्रिकेट टोलीले चीनमा भएको बेल्ट एन्ड रोड सिरिजको उपाधि एक पनि खेल नहारी जितेको छ। हङकङविरुद्धको अन्तिम खेल वर्षाले बीचमै रोकिएपछि अपराजित नेपाल च्याम्पियन बनेको हो। प्रतियोगितामा नेपालले छ खेल खेलेको थियो।

तीमध्ये चार खेलमा नेपालले जित निकालेको छ भने दुई खेल वर्षाका कारण पूरा हुन सकेनन्। नेपालले सुरुआती खेलमा थाइल्यान्डलाई सात विकेटले पराजित गरेको थियो। चीनसँगको दोस्रो खेल वर्षाका कारण नतिजाविहीन भएको थियो।

तेस्रो खेलमा नेपालले हङकङलाई ९२ रनको ठूलो अन्तरले हराएको थियो। चौथो खेलमा थाइल्यान्डमाथि नेपालले फेरि ५२ रनको जित हात पारेको थियो। पाँचौँ खेलमा नेपालले आयोजक चीनलाई ८४ रनले पछि पारेको थियो।

अन्तिम खेलमा पहिले ब्याटिङ गर्दै नेपालले ११ ओभरमा दुई विकेट गुमाएर ८८ रन जोडेको थियो। त्यसपछि मौसम नसुध्रिँदा खेल फेरि सुरु हुन सकेन। चीनमा देखाएको यो प्रदर्शन आगामी वर्ष हुने आईसीसी यू–१९ महिला टी–२० विश्वकपको तयारीका लागि महत्त्वपूर्ण मानिएको छ।

सञ्चारमाध्यममा आएको विवरणअनुसार उक्त विश्वकप सन् २०२७ जनवरी १२ देखि फेब्रुअरी ८ सम्म हुँदैछ।