प्रतिनिधि सभाको दोस्रो अधिवेशन १४५ दिनपछि सकियो, १२ विधेयक पारित

संघीय संसद् अन्तर्गत प्रतिनिधि सभाको दोस्रो अधिवेशन शुक्रबार औपचारिक रूपमा सकिएको छ। गत वैशाख २८ गते सुरु भएको अधिवेशन असोज १६ गतेसम्म १४५ दिन चल्यो। यस अवधिमा ६२ दिनमा ६८ वटा बैठक बसे र अधिवेशन कुल २७७ घण्टा ३० मिनेट चल्यो।

अधिवेशनमा ३५ वटा विधेयक दर्ता भए। तीमध्ये १२ वटा विधेयक दुवै सदनबाट पारित भएका छन् भने ११ वटा विधेयक राष्ट्रपतिबाट प्रमाणीकरण भइसकेका छन्। २० वटा विधेयक विचाराधीन छन्। शुक्रबारको बैठकले राष्ट्रिय प्रतिरक्षा विश्वविद्यालय र फोहोरमैला व्यवस्थापनसम्बन्धी विधेयकसहित सात वटा विधेयक दफावार छलफलका लागि समितिमा पठाएको थियो।

अधिवेशनको समापन गर्दै सभामुख डोलप्रसाद अर्यालले संसद्ले विपद् व्यवस्थापनसहित जनसरोकारका विषयमा गम्भीर भूमिका खेलेको बताए। उनले संसद् बहुमतको प्रक्रिया मात्र नभई जनमुखी बहसको थलो भएको उल्लेख गरे। अन्तिम बैठकमा सभामुखले लामो समय बैठकमा अनुपस्थित सांसदहरूको बिदाको निवेदन स्वीकृतिका लागि पेस गरेका थिए।

यसैबीच, राष्ट्रिय सभाको २१औँ अधिवेशन पनि शुक्रबार सकिएको छ। वैशाख २८ गतेदेखि १४५ दिन चलेको उक्त अधिवेशनमा ५२ वटा बैठक बसेका थिए।