तीन प्रदेशका पहाडमा भारी वर्षाको सम्भावना, काठमाडौंमा तापक्रम २९ डिग्रीसम्म

जल तथा मौसम विज्ञान विभागले कोशी, बागमती र गण्डकी प्रदेशका पहाडी भू-भागका एक-दुई स्थानमा आज भारी वर्षा हुन सक्ने जनाएको छ। विभागले बिहान ०८:०० बजे जारी गरेको २०८३ असोज ०४ देखि ०६ सम्मको पूर्वानुमानअनुसार हाल देशभर मनसुनी वायुसँगै पश्चिमी वायुको आंशिक प्रभाव रहेको छ। मनसुनको न्यून चापीय रेखा सरदर स्थानभन्दा दक्षिणतर्फ रहेको र उत्तर अन्डमन सागर तथा आसपासको क्षेत्रमा न्यून चापीय क्षेत्र बनेको विभागले उल्लेख गरेको छ।

उक्त प्रणाली थप बलियो बन्दै पश्चिम-उत्तरपश्चिम दिशातर्फ सर्ने देखिएको छ। आज हिमाली र पहाडी भू-भागमा साधारणतया बादल तथा तराईमा आंशिक बादल लाग्नेछ। हिमाली र पहाडी भू-भागका केही स्थानमा मेघगर्जन र चट्याङसहित मध्यमसम्मको वर्षा तथा हिमपातको सम्भावना छ।

तराईका एक-दुई स्थानमा पनि मेघगर्जनसहित मध्यमसम्म वर्षा हुने सम्भावना छ। तापक्रमको हकमा काठमाडौँमा २७ देखि २९ डिग्री सेल्सियस रहने र वर्षाको सम्भावना ३० प्रतिशत छ। पोखरा र वीरेन्द्रनगरमा पनि २७ देखि २९ डिग्री रहने, वर्षाको सम्भावना ४० प्रतिशत रहेको छ।

जनकपुरमा ३४ देखि ३६, विराटनगरमा ३३ देखि ३५ र नेपालगञ्जमा ३२ देखि ३४ डिग्री सेल्सियस तापक्रम रहने पूर्वानुमान छ। भोलि कोशी, बागमती, गण्डकी र कर्णाली प्रदेशका हिमाली भू-भागका थोरै स्थानमा वर्षा तथा हिमपात हुने सम्भावना विभागले जनाएको छ।