घरायसी र व्यावसायिक ग्यास छुट्याउने प्रस्ताव, उद्योगीलाई एक साताको समय

नेपाल आयल निगमले घरायसी र व्यावसायिक प्रयोजनको खाना पकाउने ग्यासलाई छुट्याएर फरक मूल्यमा बेच्ने प्रस्ताव अघि सारेको छ। शुक्रबार निगम र नेपाल एलपी ग्यास उद्योग संघबीच भएको बैठकमा यो प्रस्ताव पेस गरिएको हो। प्रस्तावअनुसार व्यावसायिक प्रयोगका लागि छुट्टै सिलिन्डर बजारमा नआउँदासम्म उद्योगहरूले मासिक कोटाको करिब ३० प्रतिशत ग्यास निगमबाट व्यावसायिक दरमै उठाउनुपर्नेछ।

त्यो ग्यास व्यवसायमा मात्र बेच्नुपर्ने वा त्यसका लागि छुट्टै ब्रान्ड तोक्नुपर्ने प्रस्तावमा उल्लेख छ। निगमले यसबारे निर्णय गर्न उद्योगीलाई एक साताको समय दिएको छ। उद्योग, वाणिज्य तथा आपूर्ति मन्त्रालयको अध्ययन कार्यदलले घरायसी र व्यावसायिक गरी दुई प्रकार र चार तौलका सिलिन्डर ल्याउन सिफारिस गरेको छ।

यो नीति लागू भए राज्यको अनुदान घरायसी सिलिन्डरमा मात्र सीमित हुनेछ र ठूला व्यावसायिक प्रतिष्ठानले लागत मूल्यमै ग्यास किन्नुपर्नेछ। निगमको पछिल्लो मूल्यसूचीअनुसार हाल देशभरका सबै डिपोमा एक सिलिन्डर ग्यासको खुद्रा मूल्य २ हजार ६० रुपैयाँ छ। निगमले देशभर सञ्चालनमा रहेका करिब ५८ ब्रान्डका ग्यास उद्योग गाभ्ने प्रक्रिया पनि तीव्र पारेको छ।

उद्योगीहरूले भने आयकर ऐन, २०५८ को दफा ५७ अनुसार पुँजीगत लाभकरमा छुट नपाएसम्म गाभिन सम्भव नहुने बताएका छन्। निगमका अनुसार नेपाल ग्यास र एचपी ग्यास एउटै नेपाल ग्यास ब्रान्डमा गाभिने प्रक्रिया अन्तिम चरणमा पुगेको छ।