मनसुनसँगै पश्चिमी वायुको आंशिक प्रभाव, पहाडी भेगमा भारी वर्षाको सम्भावना

देशभर मनसुनी वायुको प्रभावसँगै पश्चिमी वायुको आंशिक प्रभाव रहेको जल तथा मौसम विज्ञान विभागले जनाएको छ। विभागले आज जारी गरेको विश्लेषणअनुसार मनसुनको न्यून चापीय रेखा सरदर स्थानको दक्षिणतर्फ रहेको छ। आज देशभर साधारणतया बादल लाग्ने र हिमाली भू-भागका थोरै स्थानमा मेघगर्जन तथा चट्याङसहित मध्यमसम्मको वर्षा वा हिमपात हुने सम्भावना छ।

पहाडी भू-भागमा कोशी, बागमती, गण्डकी तथा लुम्बिनी प्रदेशका केही स्थानमा र कर्णाली तथा सुदूरपश्चिमका थोरै स्थानमा मेघगर्जनसहित मध्यमसम्मको वर्षा हुने पूर्वानुमान छ। मधेश प्रदेशसहित कोशी, बागमती, गण्डकी र लुम्बिनीका तराई भेगका केही स्थानमा आज मेघगर्जनसहित मध्यमसम्मको वर्षा हुने सम्भावना छ। भारी वर्षा भने कोशी, बागमती र गण्डकी प्रदेशका पहाडी क्षेत्रका एक-दुई स्थानमा हुनसक्ने विभागले उल्लेख गरेको छ।

भोलिका दिन कोशी, बागमती र गण्डकीका पहाडी भेगका धेरै स्थानमा वर्षा हुने र यी तीन प्रदेशका हिमाली तथा पहाडी भू-भागका एक-दुई स्थानमा भारी वर्षा हुने जनाइएको छ। तापक्रमको हिसाबले काठमाडौँमा १९ डिग्री सेल्सियस, पोखरामा २१, वीरेन्द्रनगरमा २० र विराटनगर, जनकपुर तथा नेपालगञ्जमा २४ डिग्री सेल्सियस रहने अनुमान छ। वर्षाको सम्भावना पोखरामा ६० प्रतिशत, काठमाडौँ, विराटनगर, जनकपुर र वीरेन्द्रनगरमा ४० प्रतिशत तथा नेपालगञ्जमा ३० प्रतिशत रहेको छ।