कोशी, बागमती र गण्डकीका पहाडी भागमा भारी वर्षाको सम्भावना, बङ्गालको खाडीको प्रणाली बलियो हुँदै

जल तथा मौसम विज्ञान विभागले आज कोशी, बागमती र गण्डकी प्रदेशका पहाडी क्षेत्रका एक-दुई ठाउँमा भारी वर्षा हुनसक्ने जनाएको छ। विभागका अनुसार हाल देशभर मनसुनी वायुसँगै पश्चिमी वायुको पनि आंशिक असर छ। मनसुनको न्यून चापीय रेखा सामान्य स्थानभन्दा दक्षिणतर्फ छ।

उत्तर अन्डमन सागर क्षेत्रमा बनेको न्यून चापीय क्षेत्र अहिले मध्यपूर्वी बङ्गालको खाडीमा पुगेको छ। यो प्रणाली थप शक्तिशाली बन्दै पश्चिम-उत्तरपश्चिमतर्फ सर्ने विभागको अनुमान छ। आज हिमाली र पहाडी क्षेत्रमा सामान्यतया बादल र तराईमा आंशिक बादल लाग्नेछ।

कोशी, बागमती र गण्डकीका हिमाली तथा पहाडी क्षेत्रका केही ठाउँमा मेघगर्जन र चट्याङसहित मध्यमसम्म वर्षा वा हिमपात हुनसक्छ। लुम्बिनी, कर्णाली र सुदूरपश्चिमका हिमाली र पहाडी भागका थोरै ठाउँमा पनि यस्तै सम्भावना छ। मधेश प्रदेश तथा बागमती र गण्डकीको तराईका थोरै ठाउँमा पनि चट्याङसहित वर्षा हुनसक्छ।

काठमाडौँ र पोखरामा वर्षाको सम्भावना ४० प्रतिशत छ। काठमाडौँको तापक्रम २९ देखि ३१ र पोखराको ३० देखि ३२ डिग्री सेल्सियस रहने अनुमान छ। विराटनगर, जनकपुर र नेपालगञ्जमा तापक्रम ३४ देखि ३६ डिग्री सेल्सियस पुग्ने र वर्षाको सम्भावना २० प्रतिशत रहने विभागले जनाएको छ।

भोलि पनि मधेश तथा कोशी र बागमतीको तराईका एक-दुई ठाउँमा चट्याङसहित वर्षा हुनसक्छ।