कांग्रेस सहमहामन्त्रीमा तीन महिला नेतृसहित धेरै नेताको उम्मेदवारी घोषणा

नेपाली कांग्रेसको आजदेखि सुरु भएको १५औँ महाधिवेशनमा सहमहामन्त्री पदका लागि धेरै नेताले उम्मेदवारी घोषणा गरेका छन्।

केन्द्रीय कार्यसमितिमा रहेका प्रतिमा गौतम, ईश्वरी न्यौपाने र सीता गुरुङले सहमहामन्त्री पदमा उम्मेदवारी दिने घोषणा गरेका छन्। न्यौपाने कांग्रेस संसदीय दलकी पूर्वसचेतक तथा राज्य व्यवस्था तथा सुशासन समितिकी पूर्वसभापति हुन्।

हाल सहमहामन्त्री रहेका योगेन्द्र चौधरी र प्रकाश रसाइली 'स्नेही'ले फेरि सोही पदमा उम्मेदवार बन्ने इच्छा व्यक्त गरेका छन्। पुनः सहमहामन्त्रीमा उम्मेदवारी घोषणा गर्दै रसाइलीले गगन थापाको नेतृत्वमा कांग्रेस र देशलाई बलियो बनाउन लाग्ने बताए।

यस्तै केन्द्रीय सदस्य अब्दुल सत्तार, चितवनका पूर्वपार्टी सभापति विकास कोइराला र दोलखा सभापति बर्मा लामाले पनि सहमहामन्त्रीमा उम्मेदवारी घोषणा गरेका छन्। लामाले जनजाति समावेशीतर्फबाट उम्मेदवारी दिने बताएका छन्।

महाधिवेशनको तालिकाअनुसार असोज १९ र २० गते बन्दसत्र हुनेछ भने असोज २१ र २२ गते निर्वाचन प्रक्रिया हुनेछ।