बाढी पसेपछि म्याग्दीको रेलेखोला जलविद्युत् आयोजना बन्द

म्याग्दीको अन्नपूर्ण गाउँपालिका–४ नारच्याङमा रहेको रेलेखोला जलविद्युत् आयोजना बन्द भएको छ। आयोजनाको 'इन्टेक' (बाँध) मा बाढी पसेपछि विद्युत् उत्पादन रोकिएको हो।

ह्युम कन्सल्ट प्रालि यो आयोजनाको प्रवर्द्धक हो। आयोजनाको क्षमता छ मेगावाट छ।

रेलेखर्क क्षेत्रमा पहिरो गएपछि रेलेखोलामा बाढीको सतह बढ्यो र बाढी आयोजनाको बाँधसम्म पुग्यो। बाढीले बाँधमा क्षति पुर्‍याएको छ।

बाँधमा बाढी पसेपछि आयोजनाबाट हुने विद्युत् उत्पादन पूर्ण रूपमा बन्द भएको छ। म्याग्दीको अन्नपूर्ण गाउँपालिका पछिल्लो समय बाढीपहिरोबाट प्रभावित क्षेत्रमा पर्छ।