अर्थमन्त्री वाग्ले र भारतीय विदेशमन्त्री जयशंकरबीच भेटवार्ता

भारत भ्रमणमा रहनुभएका अर्थमन्त्री डा. स्वर्णिम वाग्लेले शुक्रबार साँझ नयाँदिल्लीमा भारतीय विदेशमन्त्री डा. एस.

जयशङ्करसँग भेट गर्नुभएको छ। भ्रमणको दोस्रो दिनको भेटमा अर्थमन्त्री वाग्लेले रसुवाको आकस्मिक बाढीपछि उद्धार र राहतमा भारत सरकारले गरेको सहयोगप्रति धन्यवाद दिनुभएको छ। नयाँदिल्लीस्थित नेपाली दूतावासका अनुसार लगानी, ऊर्जा र कनेक्टिभिटीमा दुई देशबीचको सहकार्य बलियो बनाउने उपायबारे छलफल भएको छ।

विदेशमन्त्री जयशङ्करले आर्थिक, राजनीतिक र कनेक्टिभिटीका विषयमा कुराकानी भएको उल्लेख गर्नुभएको छ। शुक्रबार नै अर्थमन्त्री वाग्लेले पूर्वविदेशसचिव श्याम शरणले इन्डिया इन्टरनेसनल सेन्टरमा आयोजना गरेको उच्चस्तरीय गोलमेच संवादलाई सम्बोधन गर्नुभएको थियो। संवादमा उहाँले भौतिक, डिजिटल र ऊर्जा सञ्जाल विस्तार नगरी साझेदारी समयसापेक्ष नहुने बताउनुभएको छ।

नेपाल–भारत व्यापार सन्धिमा सुधार गरेर व्यापारघाटा घटाउनुपर्ने र गैरभन्सार अवरोध हटाउनुपर्ने उहाँको भनाइ छ। नेपालमा लगानीको वातावरण सुधार्न नीतिगत र कानुनी सुधार भइरहेको भन्दै उहाँले ऊर्जा, प्रविधि र उत्पादनमूलक उद्योगमा भारतीय लगानी बढाउन आग्रह गर्नुभएको छ। विपद्पछिको पुनर्निर्माण दिगो र सुरक्षित बनाउन नेपालले 'बिल्ड ब्याक बेटर' अवधारणा लागू गरिरहेको पनि उहाँले जानकारी दिनुभएको छ।

भ्रमणको पहिलो दिन उहाँले भारतीय अर्थमन्त्री निर्मला सीतारमणसँग द्विपक्षीय आर्थिक सहकार्यबारे छलफल गर्नुभएको थियो।