म्यानपावर विवादले मलेसियाको नयाँ भिसा प्रक्रिया रोकियो

म्यानपावर कम्पनी छनोटसम्बन्धी विवाद नसुल्झिँदा मलेसियामा नयाँ नेपाली श्रमिक पठाउने प्रक्रिया रोकिएको छ। मलेसियाको विदेशी कामदार व्यवस्थापन प्रणाली एफडब्लुसीएमएसले असोज १५ देखि नयाँ श्रमिकको बायोमेडिकल दर्ता बन्द गरेपछि कलिङ भिसा जारी हुन सकेको छैन। मलेसियाले २५ मुख्य भर्ती एजेन्सी र तिनीहरूमातहत २५० सहायक एजेन्सी रहने संरचना तय गरेको छ, तर नेपालले यसलाई अनुमति दिएको छैन।

नेपालले इजाजतप्राप्त सबै झन्डै ११ सय सक्रिय म्यानपावरलाई मुख्य एजेन्सीका रूपमा सूचीकृत गर्न प्रस्ताव गरेको थियो। तर, मलेसियाको मानव संसाधन मन्त्रालयले अक्टोबर ६ मा श्रम, रोजगार तथा सामाजिक सुरक्षामन्त्री रामजी यादवलाई पत्र पठाएर नेपालको प्रस्ताव अस्वीकार गरेको छ। उसले हालकै व्यवस्था कायम राख्ने जनाएको छ।

श्रमिक भर्ती प्रक्रियालाई पारदर्शी, सुरक्षित र जवाफदेही बनाउन यो व्यवस्था ल्याइएको मलेसियाको भनाइ छ। मलेसियाले केही म्यानपावरलाई मात्र छानेकोमा नेपाली पक्षले असन्तुष्टि जनाउँदै आएको छ। कामदार भर्नासम्बन्धी वार्ताका लागि नेपालले मलेसियालाई पत्राचार गरेको छ।

मलेसिया नेपाली युवाका लागि वैदेशिक रोजगारीको प्रमुख गन्तव्यमध्ये एक हो।