भारी वर्षाको चेतावनी: ४२ जिल्ला उच्च सतर्कतामा, सुरक्षा निकाय हाइ अलर्ट

बंगालको खाडीमा विकसित न्यून चापीय प्रणाली थप शक्तिशाली बन्दै पश्चिम–उत्तरपश्चिम दिशातर्फ सर्ने क्रममा रहेको जल तथा मौसम विज्ञान विभागले जनाएको छ। विभागका अनुसार असोज ९ गते शुक्रबारदेखि ११ गते आइतबारसम्म गण्डकी र लुम्बिनी प्रदेशका केही स्थानमा भारीदेखि अति भारी वर्षाको सम्भावना छ। कोशी, मधेश, बागमती र सुदूरपश्चिम प्रदेशका धेरै स्थानमा पनि भारी वर्षा हुने पूर्वानुमान छ।

आज कोशी प्रदेशको पहाडी तथा बागमती प्रदेशको पहाडी र तराई भू-भागका एक–दुई स्थानमा भारी वर्षा हुन सक्ने विभागको बुलेटिनमा उल्लेख छ। काठमाडौँमा आज तापक्रम २७ देखि २९ डिग्री सेल्सियससम्म र वर्षाको सम्भावना ६० प्रतिशत रहेको छ। पोखरा र विराटनगरमा पनि वर्षाको सम्भावना ६० प्रतिशत छ।

बाढी पूर्वानुमान महाशाखाका अनुसार आज करिब ३१ जिल्ला भएर बग्ने साना नदीमा आकस्मिक बाढीको मध्यम जोखिम छ। असोज ९, १० र ११ गते प्रायः सबै प्रमुख नदीमा जलसतह उल्लेख्य रूपमा बढ्नेछ। सरकारले राष्ट्रिय विपद् जोखिम न्यूनीकरण तथा व्यवस्थापन प्राधिकरणसँग समन्वय गरी नेपाल प्रहरी, सशस्त्र प्रहरी र नेपाली सेनालाई ४ दिनका लागि हाई अलर्टमा राखेको छ।

सुरक्षा निकायका कर्मचारीको बिदा कटौती गरिएको छ भने प्रमुख जिल्ला अधिकारीहरूलाई अत्यावश्यकबाहेक जिल्ला नछोड्न निर्देशन दिइएको छ। गृहमन्त्री सुधन गुरुङ र ऊर्जामन्त्री विराजभक्त श्रेष्ठले मौसम पूर्वानुमान महाशाखा पुगेर ४ दिनको पूर्वानुमानबारे जानकारी लिनुभएको छ।