समानान्तर महाधिवेशनका लागि देउवा पक्षले जिल्ला संयोजक तोक्यो

नेपाली कांग्रेसका निवर्तमान सभापति शेरबहादुर देउवा पक्षले छुट्टै १५औँ महाधिवेशनका लागि अधिकांश जिल्लामा संयोजक तोकेको छ। पूर्वमहामन्त्री डा. शशांक कोइराला संयोजक रहेको महाधिवेशन तयारी समितिले जिल्ला संयोजकलाई जिम्मेवारीको पत्र दिइरहेको छ।

देउवा पक्षले असोज १५ गतेदेखि वडा अधिवेशन सुरु गरी मंसिर २१ देखि २३ गतेसम्म महाधिवेशन गर्ने तयारी गरेको छ। संस्थापन पक्षले भने असोज १६ गतेदेखि आफ्नो महाधिवेशन प्रक्रिया अघि बढाउँदैछ र हाल वडा तथा पालिका अधिवेशनमा केन्द्रित छ। १४औँ महाधिवेशनबाट चुनिएका अधिकांश जिल्ला सभापति संस्थापन पक्षमा उभिएपछि देउवा पक्षले समानान्तर संयोजक तोकेको हो।

काठमाडौँमा जयकृष्ण महर्जन, ललितपुरमा सुदर्शन घिमिरे, भक्तपुरमा दुर्लभ थापा र चितवनमा मिलन श्रेष्ठ संयोजक बन्नुभएको छ। दोलखामा ताराकुमार खड्का, रसुवामा उपेन्द्र लम्साल, नुवाकोटमा श्रीराम श्रेष्ठ र मकवानपुरमा भीम लामालाई जिम्मेवारी दिइएको छ। कोशी प्रदेशतर्फ झापामा कृष्ण हुमागाईं, मोरङमा सुभास पौडेल, पाँचथरमा डेकेन्द्रकुमार तामाङ र उदयपुरमा बसन्त बस्नेत संयोजक हुनुहुन्छ।

मधेश प्रदेशका सबै जिल्लासहित सिन्धुली, काभ्रे, तनहुँ, मुस्ताङ, स्याङ्जा, अछाम, सल्यान, रुकुम पश्चिम, ताप्लेजुङ, इलाम र तेह्रथुम लगायतमा संयोजक तोक्न बाँकी छ। सचिवालय समन्वय समितिका संयोजक दीपकप्रसाद कुइँकेलले बाँकी जिल्लाको काम भइरहेको र नामावली चाँडै औपचारिक रूपमा सार्वजनिक गरिने बताउनुभएको छ।