देशभर बादल, पहाडी भू-भागका केही स्थानमा भारी वर्षाको सम्भावना

देशभर बदली रहँदा कोशी, बागमती र गण्डकी प्रदेशका एक-दुई ठाउँमा आज र भोलि भारी वर्षा हुने सम्भावना रहेको जल तथा मौसम विज्ञान विभागले जनाएको छ। विभागका अनुसार मनसुनी वायुको असर देशभरि कायमै छ भने मनसुनको न्यून चापीय रेखा सामान्य स्थानभन्दा दक्षिणमा रहेको छ। आज कोशी प्रदेशको पहाडी र तराई, बागमतीको तराई तथा गण्डकीको पहाडी क्षेत्रका एक-दुई ठाउँमा भारी वर्षाको सम्भावना छ।

भोलि भने कोशी, बागमती र गण्डकीका पहाडी क्षेत्रका एक-दुई ठाउँमा भारी वर्षा हुन सक्ने विभागले उल्लेख गरेको छ। मधेश प्रदेशसहित अधिकांश प्रदेशका तराई र पहाडी क्षेत्रका केही ठाउँमा मेघगर्जन र चट्याङका साथ मध्यमसम्म वर्षा हुन सक्ने अनुमान छ। हिमाली क्षेत्रका केही ठाउँमा मध्यमसम्म वर्षा वा हिमपात हुने सम्भावना छ।

पोखरा र विराटनगरमा वर्षाको सम्भावना ६० प्रतिशत छ भने तापक्रम क्रमशः २१ र २४ डिग्री सेल्सियस रहने पूर्वानुमान छ। काठमाडौँमा १८ डिग्री सेल्सियस तापक्रम रहने र वर्षाको सम्भावना ४० प्रतिशत रहेको विभागले जनाएको छ। जनकपुरमा पनि वर्षाको सम्भावना ४० प्रतिशत छ भने तापक्रम २४ डिग्री सेल्सियस रहने अनुमान छ।

नेपालगञ्जमा २५ र वीरेन्द्रनगरमा २० डिग्री सेल्सियस तापक्रम रहँदा दुवै सहरमा वर्षाको सम्भावना ३० प्रतिशत छ।