लिग–२ को अन्तिम खेलमा नेपालले ओमानलाई १० रनले हरायो, छैटौँ स्थान पक्का

आईसीसी पुरुष क्रिकेट विश्वकप लिग–२ अन्तर्गत आफ्नो अन्तिम खेलमा नेपालले ओमानलाई १० रनले पराजित गरेको छ। सोमबार ओमानको अल अमेरात क्रिकेट मैदानमा भएको खेलमा नेपालले दिएको २८१ रनको लक्ष्य पछ्याएको ओमान लक्ष्यभन्दा १० रन पछाडि रोकियो।

पहिले ब्याटिङ गरेको नेपालले घरेलु टोली ओमानसामु २८१ रनको लक्ष्य राखेको थियो। नेपालका तीन जना ब्याटरले अर्धशतक बनाए। सोही खेलमा रोहित पौडेलले एक हजार रन पूरा गरेका छन्।

लक्ष्य पछ्याउने क्रममा ओमान बलियो देखिए पनि नेपालले बलिङमा शानदार पुनरागमन गर्दै खेल आफ्नो पक्षमा पारेको हो।

यो जितसँगै नेपालले लिग–२ को अङ्क तालिकामा शीर्ष ६ भित्र रहँदै छैटौँ स्थान पक्का गरेको छ। छैटौँ स्थान सुरक्षित भएसँगै नेपालको एकदिवसीय अन्तर्राष्ट्रिय (ओडीआई) मान्यता कायम रहने सम्भावना उच्च बनेको छ।