मध्यपुर थिमी नगरपालिकाका प्रमुख प्रशासकीय अधिकृत घिमिरे घुस रकमसहित अख्तियारको नियन्त्रणमा

अख्तियार दुरुपयोग अनुसन्धान आयोगले भक्तपुरको मध्यपुर थिमी नगरपालिकाका प्रमुख प्रशासकीय अधिकृत भोजराज घिमिरेलाई घुस रकमसहित नियन्त्रणमा लिएको छ।

नगरपालिकामा घुस लेनदेन भइरहेको सूचनाका आधारमा आयोगको टोलीले सोमबार नगरपालिकाको कार्यालयमा छापा मारेको थियो। सोमबार अपराह्न प्रमुख प्रशासकीय अधिकृत घिमिरेलाई घुससहित नियन्त्रणमा लिइएको हो।

रातोपाटीका अनुसार घिमिरेले लिएको ३३ लाख रुपैयाँ घुस रकम बरामद गरिएको छ। राजधानीका अनुसार छापाका क्रममा प्रमुख प्रशासकीय अधिकृतसहित अन्य कर्मचारीलाई पनि नियन्त्रणमा लिइएको छ।

यस विषयमा आयोगले थप अनुसन्धान गरिरहेको जनाइएको छैन; विस्तृत विवरण आउन बाँकी छ।