भारत विरोधमा राष्ट्रवाद देखाउने चलन सकिँदै: रास्वपा सांसद पन्त

राष्ट्रिय स्वतन्त्र पार्टीका सांसद बुद्धिप्रसाद (हरि) पन्तले भारतको विरोधलाई राष्ट्रवादको आधार बनाउने प्रवृत्ति बिस्तारै हराउँदै गएको बताउनुभएको छ। वीरगन्जस्थित भारतीय महावाणिज्य दूतावासले ‘वन्दे मातरम्’ गीतको १५०औँ वर्षको अवसरमा आयोजना गरेको सांगीतिक कार्यक्रममा मुख्य अतिथिका रूपमा बोल्दै उहाँले यस्तो धारणा राख्नुभएको हो। रास्वपा पर्साका सभापतिसमेत रहनुभएका पन्तका अनुसार नेपाल र भारतको सम्बन्ध साधारण छिमेकीभन्दा फरक र विशिष्ट प्रकृतिको छ।

दुई देशबीचको साझा सभ्यता, परम्परा, धार्मिक आस्था र पारिवारिक नाताले सम्बन्धलाई जीवन्त राखेको उहाँको भनाइ छ। दसैँ, दीपावली, छठ र होलीजस्ता चाडले दुवै देशका जनतालाई सांस्कृतिक रूपमा नजिक ल्याएको उहाँले उल्लेख गर्नुभएको छ। भारतसँगको सम्बन्धलाई नेपालले सधैँ उच्च प्राथमिकतामा राख्दै आएकाले त्यसलाई कुनै कार्डको रूपमा प्रयोग गर्न नमिल्ने उहाँको तर्क छ।

सांसद पन्तले बालेन नेतृत्वको सरकारले ‘चाइना कार्ड’ वा ‘भारत कार्ड’ कुनैमा पनि भरोसा नगर्ने स्पष्ट पार्नुभएको छ।