देशभर बदली, लुम्बिनी र सुदूरपश्चिमका केही स्थानमा भारी वर्षाको सम्भावना

जल तथा मौसम विज्ञान विभागले आज देशभर सामान्यतया बदली रहने र लुम्बिनी तथा सुदूरपश्चिम प्रदेशका पहाडी र तराई क्षेत्रका एक-दुई ठाउँमा भारी वर्षा हुनसक्ने जनाएको छ। बागमती, गण्डकी र कर्णाली प्रदेशका पहाडी क्षेत्रमा पनि एक-दुई स्थानमा भारी पानी पर्ने सम्भावना छ। विभागका अनुसार अहिले पश्चिमी न्यून चापीय प्रणाली र मनसुनी वायु दुवैको असर देशमा परेको छ।

हिमाली क्षेत्रका थोरै ठाउँमा चट्याङसहित मध्यम वर्षा वा हिमपातको सम्भावना छ। काठमाडौँको तापक्रम २६ देखि २८ डिग्री सेल्सियस र पोखराको २८ देखि ३० डिग्री रहने अनुमान छ। विराटनगरमा तापक्रम सबैभन्दा बढी ३२ देखि ३४ डिग्रीसम्म पुग्ने विभागले जनाएको छ।

काठमाडौँ, पोखरा, नेपालगञ्ज र वीरेन्द्रनगरमा वर्षाको सम्भावना ४० प्रतिशत छ। भोलि हिमाली र पहाडी क्षेत्रमा बदली रहँदै केही ठाउँमा मध्यमसम्मको वर्षा हुने र मधेश, कोशीलगायतका तराईमा आंशिक बदली हुने पूर्वानुमान छ।