आजको मौसम: पहाडी भेगमा वर्षा, बङ्गालको खाडीको प्रणाली बलियो बन्दै

जल तथा मौसम विज्ञान विभागका अनुसार आज देशका हिमाली र पहाडी भू-भागमा साधारणतया बादल र तराईमा आंशिक बादल लाग्नेछ। कोशी, बागमती, गण्डकी र कर्णाली प्रदेशका हिमाली भू-भागका थोरै स्थानमा मेघगर्जनसहित मध्यमसम्मको वर्षा तथा हिमपातको सम्भावना छ। भोलि कोशी, बागमती, गण्डकी र लुम्बिनी प्रदेशका पहाडी भू-भागका एक-दुई स्थानमा भारी वर्षाको सम्भावना विभागले जनाएको छ।

उत्तर अन्डमान सागर र आसपासमा बनेको न्यून चापीय प्रणाली थप बलियो बन्दै पश्चिम-उत्तरपश्चिम दिशातर्फ सर्ने देखिएको छ। यो प्रणाली असोज ७ गते आसपास दक्षिण ओडिशा र उत्तर आन्ध्र प्रदेशको तटीय क्षेत्र नजिकबाट जमिनतर्फ प्रवेश गर्ने प्रक्षेपण छ। यसले नेपालमा वर्षा गराउने भए पनि जोखिमको स्तर र सम्भावित असर अहिल्यै यकिन गर्न नसकिने मौसमविद् रोजन लामिछानेले बताउनुभएको छ।

काठमाडौँमा आज तापक्रम १८ देखि २० डिग्री सेल्सियस र वर्षाको सम्भावना ३० प्रतिशत छ। पोखरामा १९ देखि २१ डिग्रीसँगै वर्षाको सम्भावना ४० प्रतिशत छ। विराटनगरमा तापक्रम २३ देखि २५ डिग्री र वर्षाको सम्भावना ३० प्रतिशत छ।

नेपालगञ्जमा २५ देखि २७ र जनकपुरमा २४ देखि २६ डिग्री तापक्रमसँगै आंशिक बादल रहनेछ। वीरेन्द्रनगरमा तापक्रम २१ देखि २३ डिग्री र वर्षाको सम्भावना २० प्रतिशत छ। मनसुन प्रतिकार्य कमाण्ड पोस्टको बैठकले प्रणालीको निरन्तर निगरानी गर्दै सम्बन्धित निकायलाई सतर्क गराउने निर्णय गरेको छ।