कोशीमा लाइसेन्सका लागि निरोगिता प्रमाणपत्रमा नयाँ शुल्क

कोशी प्रदेशमा सवारी चालक अनुमतिपत्रका लागि चाहिने निरोगिता प्रमाणपत्र लिन अब सेवाग्राहीले पहिलेभन्दा बढी रकम तिर्नुपर्ने व्यवस्था हुन लागेको छ। प्रदेशको आन्तरिक मामिला तथा कानुन मन्त्रालयले करारका चिकित्सकबाट दिइँदै आएको सेवा हटाएर सूचीकृत चिकित्सकमार्फत प्रमाणपत्र दिने तयारी गरेको छ। नयाँ व्यवस्थामा तपाईंले प्रदेश सरकारलाई करिब ३५० रुपैयाँ राजस्व र चिकित्सकलाई करिब १५० रुपैयाँ शुल्क गरी झन्डै ५०० रुपैयाँ बुझाउनुपर्नेछ।

यसअघि राजस्वबापत करिब ३५० रुपैयाँ मात्र तिरे पुग्थ्यो। प्रमाणपत्र दिन इच्छुक चिकित्सकलाई सूचीकृत हुन मन्त्रालयले आह्वान गरेको छ। मन्त्रालयका सचिव कृष्ण सापकोटाले सङ्घीय सरकारको परिपत्रअनुसार यो व्यवस्था लागू गर्न लागिएको बताउनुभएको छ।

करिब २ वर्षअघि स्वास्थ्य परीक्षणका नाममा घूस र बढी रकम असुलिएको गुनासो आएपछि प्रदेश सरकारले यातायात व्यवस्था कार्यालयहरूमा करारका चिकित्सक खटाएको थियो। इटहरी र बिर्तामोडमा दुई–दुई जना र अन्य कार्यालयमा एक–एक जना चिकित्सकले सेवा दिँदै आएका थिए। सेवाग्राहीमाथि आर्थिक भार थोपर्न खोजिएको भन्दै नयाँ व्यवस्थाको विरोध पनि भएको छ।