आज र भोलि कोशी, बागमतीलगायतका पहाडमा भारी वर्षाको सम्भावना

कोशी, बागमती, गण्डकी र लुम्बिनी प्रदेशका पहाडी क्षेत्रमा आज एक-दुई ठाउँमा भारी वर्षा हुन सक्ने जल तथा मौसम विज्ञान विभागले जनाएको छ। भोलि कोशी र बागमतीका पहाडी भेग तथा मधेश प्रदेशका एक-दुई ठाउँमा भारी वर्षाको सम्भावना रहेको विभागको पूर्वानुमानमा उल्लेख छ। विभागका अनुसार अहिले देशभर मनसुनी वायुसँगै पश्चिमी वायुको पनि आंशिक असर छ।

बङ्गालको खाडीको मध्य-पश्चिम भागमा रहेको न्यून चापीय क्षेत्र थप बलियो बनेर पश्चिम-उत्तरपश्चिमतर्फ अघि बढ्ने सम्भावना छ। आज हिमाली र पहाडी भेगमा प्रायः बादल लाग्ने र तराईमा आंशिक बादल रहने विभागले जनाएको छ। कोशी, बागमती र गण्डकीका हिमाली तथा पहाडी क्षेत्रका केही ठाउँमा मेघगर्जन र चट्याङसहित मध्यमसम्म वर्षा वा हिमपात हुन सक्छ।

मधेशसहित तराईका केही ठाउँमा पनि मेघगर्जनसहित वर्षा हुने सम्भावना छ। प्रमुख सहरमध्ये काठमाडौँमा आज वर्षाको सम्भावना ६० प्रतिशत छ र तापक्रम २८ देखि ३० डिग्री सेल्सियस रहने अनुमान छ। पोखरा र विराटनगरमा वर्षाको सम्भावना ४० प्रतिशत छ भने तापक्रम क्रमशः २९ देखि ३१ र ३२ देखि ३४ डिग्री सेल्सियस रहने अनुमान छ।

नेपालगञ्ज र जनकपुरमा तापक्रम ३४ देखि ३६ डिग्री सेल्सियससम्म पुग्ने र वर्षाको सम्भावना २० प्रतिशत मात्र रहेको विभागले जनाएको छ।